యూఏఈలో నోటీసు పీరియడ్ లేకుండానే రిజైన్ చేయవచ్చా?

- February 24, 2026 , by Maagulf

దుబాయ్: సాధారణంగా యూఏఈలో ఉద్యోగం వదిలిపెట్టాలంటే కనీసం 30 రోజుల నోటీసు పీరియడ్ సర్వ్ చేయడం తప్పనిసరి. కానీ, కొన్ని ప్రత్యేక పరిస్థితుల్లో నోటీసు పీరియడ్ అవసరం లేకుండానే తక్షణమే రాజీనామా చేసే హక్కును యూఏఈ లేబర్ లాలోని ఆర్టికల్ 45 ఉద్యోగులకు కల్పిస్తోంది.

ఆ 4 పరిస్థితులు ఇవే:

1. యజమాని మీ హక్కులను ఉల్లంఘించినప్పుడు

ఒప్పందం ప్రకారం లేదా లేబర్ లా ప్రకారం యజమాని మీ హక్కులను కాలరాస్తే మీరు వెంటనే తప్పుకోవచ్చు. అయితే దీనికి కొన్ని నిబంధనలు ఉన్నాయి:

• రాజీనామాకు 14 రోజుల ముందే MOHREకి ఫిర్యాదు చేయాలి.

• సమస్యను సరిదిద్దుకోవడానికి యజమానికి అవకాశం ఇవ్వాలి.

• MOHRE నోటీసు ఇచ్చినా యజమాని మార్పు చెందకపోతే, మీరు వెంటనే రిజైన్ చేయవచ్చు.

2. పని ప్రదేశంలో దాడికి గురైనప్పుడు

యజమాని లేదా వారి ప్రతినిధి మీపై శారీరక దాడికి పాల్పడితే, మీరు నోటీసు ఇవ్వాల్సిన పనిలేదు.

• గమనిక: ఈ ఘటనపై 5 పనిదినాల లోపు సంబంధిత అధికారులు మరియు MOHREకి నివేదించాలి.

3. ప్రాణాపాయం లేదా ఆరోగ్యానికి ముప్పు ఉంటే

పని ప్రదేశంలో మీ భద్రతకు లేదా ఆరోగ్యానికి తీవ్రమైన ముప్పు ఉందని తెలిసినా, యజమాని దానిని పట్టించుకోకపోతే మీరు వెంటనే రాజీనామా చేయవచ్చు.

4. ఒప్పందానికి విరుద్ధంగా వేరే పని చేయమని ఒత్తిడి చేస్తే

మీ ఎంప్లాయిమెంట్ కాంట్రాక్ట్‌లో ఉన్న పని కాకుండా, దానికి పూర్తి భిన్నమైన పనులు చేయమని మీ అంగీకారం లేకుండా ఒత్తిడి చేస్తే, మీరు నోటీసు పీరియడ్ లేకుండానే తప్పుకోవచ్చు.

ముఖ్య గమనిక: పైన పేర్కొన్న సందర్భాల్లో మీరు తక్షణమే రాజీనామా చేసినా, మీ సర్వీస్ బెనిఫిట్స్ (Gratuity) వంటి చట్టపరమైన హక్కులన్నీ మీకు దక్కుతాయి. మీరు ఎటువంటి నష్టపరిహారం చెల్లించాల్సిన అవసరం లేదు.

సాధారణ నిబంధనలు (ఆర్టికల్ 43):

పైన చెప్పిన ప్రత్యేక కారణాలు లేకపోతే, ఈ క్రింది నిబంధనలు వర్తిస్తాయి:

• నోటీసు పీరియడ్: కనీసం 30 రోజులు, గరిష్టంగా 90 రోజులు ఉండాలి.

• జీతం: నోటీసు పీరియడ్ సమయంలో మీరు పూర్తి జీతానికి అర్హులు.

• నష్టపరిహారం: ఒకవేళ నోటీసు పీరియడ్ సర్వ్ చేయకుండా రిజైన్ చేస్తే, ఆ కాలానికి సరిపడా వేతనాన్ని యజమానికి "నోటీసు పీరియడ్ అలవెన్స్"గా చెల్లించాల్సి ఉంటుంది.

• ఉద్యోగ వేట కోసం సెలవు: కంపెనీయే మిమ్మల్ని తీసేస్తే, కొత్త ఉద్యోగం వెతుక్కోవడానికి వారానికి ఒక రోజు వేతనం లేని సెలవు (Unpaid leave) పొందే హక్కు మీకు ఉంటుంది.

మీరు రాజీనామా చేయాలనుకుంటే, ముందుగా మీ కాంట్రాక్ట్ నిబంధనలను ఒకసారి సరిచూసుకోండి. చట్టపరమైన చిక్కులు రాకుండా ఉండాలంటే నిబంధనల ప్రకారం వ్యవహరించడం ఉత్తమం.

--బాజీ షేక్(యూఏఈ)