దుబాయ్: దుబాయ్ రూలర్ గౌరవనీయులైన షేక్ మహమ్మద్ బిన్ రషీద్ అల్ మక్తూమ్ జారీ చేసిన కొత్త చట్టం (Law No. 4 of 2026) ప్రకారం, ఇక పై దుబాయ్‌లో షేర్డ్ హౌసింగ్ నిర్వహణ మరియు నివాసాల పై కఠినమైన నిబంధనలు అమలు కానున్నాయి. నగరంలో పెరుగుతున్న జనసాంద్రతను క్రమబద్ధీకరించడానికి, అక్రమ నివాసాలను అరికట్టడానికి మరియు నివాసితులకు ఆరోగ్యకరమైన, సురక్షితమైన వాతావరణాన్ని కల్పించడానికి ఈ చట్టం రూపొందించబడింది.దీని ప్రకారం, ఏ యజమాని అయినా తన నివాసాన్ని ఒకటి కంటే ఎక్కువ కుటుంబాలు లేదా వ్యక్తులకు షేరింగ్ పద్ధతిలో ఇవ్వాలంటే దుబాయ్ మున్సిపాలిటీ నుండి ముందస్తు అనుమతి పొందడం తప్పనిసరి.నివాస ప్రాంతాన్ని బట్టి అక్కడ ఎంత మంది ఉండవచ్చు, ఒక్కొక్కరికి ఎంత స్థలం కేటాయించాలి మరియు ఎలాంటి సదుపాయాలు ఉండాలనే అంశాలను మున్సిపాలిటీ నిర్ణయిస్తుంది.ముఖ్యంగా, అద్దెకు తీసుకున్న వ్యక్తి ఆ నివాసాన్ని మళ్ళీ ఇతరులకు సబ్-లీజుకు ఇవ్వడం ఈ చట్టం ప్రకారం పూర్తిగా నిషిద్ధం.

ఈ నిబంధనలను అతిక్రమించే వారి పై ప్రభుత్వం అత్యంత కఠినమైన జరిమానాలు విధించనుంది. నిబంధనల ఉల్లంఘనకు పాల్పడితే కనిష్టంగా Dh500 నుండి గరిష్టంగా Dh500,000 వరకు జరిమానా విధిస్తారు. ఒకవేళ ఏడాది లోపు అదే తప్పు మళ్ళీ పునరావృతమైతే, ఆ జరిమానా Dh10 లక్షల (Dh1 million) వరకు పెరిగే అవకాశం ఉంది. అంతేకాకుండా, నిబంధనలకు విరుద్ధంగా ఉన్న నివాసాల నుండి అద్దెదారులను ఖాళీ చేయించడం, విద్యుత్ మరియు నీటి సరఫరాను నిలిపివేయడం వంటి చర్యలు కూడా తీసుకోవచ్చు. ఇప్పటికే షేరింగ్ పద్ధతిలో నివసిస్తున్న వారు లేదా ఇళ్లను అద్దెకు ఇస్తున్న వారు ఈ చట్టం అమలులోకి వచ్చిన ఏడాది లోపు తమ నివాసాలను కొత్త నిబంధనలకు అనుగుణంగా మార్చుకోవాల్సి ఉంటుంది. దీనివల్ల దుబాయ్ రియల్ ఎస్టేట్ రంగంలో పారదర్శకత పెరగడమే కాకుండా, నగర జీవన ప్రమాణాలు మెరుగుపడతాయని అధికారులు భావిస్తున్నారు.

ఈ చట్టం అధికారిక గెజిట్‌లో ప్రచురించిన తేదీ నుండి 180 రోజుల తరువాత అమల్లోకి వస్తుంది.

--బాజీ షేక్(యూఏఈ)