యంగ్ హీరో సుమంత్ ప్రభాస్ రూరల్ లవ్, ఫ్యామిలీ డ్రామా ‘గోదారి గట్టుపైన’తో అలరించబోతున్నారు. సుభాష్ చంద్ర దర్శకత్వంలో రెడ్ పప్పెట్ ప్రొడక్షన్స్ నిర్మించింది. నిధి ప్రదీప్ ఈ చిత్రంలో కథానాయికగా నటించగా, జగపతి బాబు కీలక పాత్రలో కనిపించనున్నారు. టీజర్, పాటలకు అద్భుతమైన స్పందన వచ్చింది. ఈ చిత్రం మే 8న వరల్డ్‌వైడ్ రిలీజ్ కానుంది. ఈ సందర్భంగా మ్యూజిక్ డైరెక్టర్ నాగ వంశీ విలేకరుల సమావేశంలో సినిమా విశేషాలు పంచుకున్నారు.

మీ మ్యూజిక్ జర్నీ గురించి?
-మాది హనుమకొండ, వరంగల్. మా నాన్న సంగీతకారుడు. ఆయన ఫ్లూట్, కీబోర్డ్ ప్లే చేస్తారు. అక్కడ మాకు స్టూడియో ఉంది. మా నాన్న దగ్గర నేను కీబోర్డ్ నేర్చుకున్నాను. షార్ట్ ఫిలిమ్స్‌కు పనిచేస్తున్నప్పుడు సుభాష్ తో పరిచయం అయ్యింది. ఆయన మొదటిగా ‘క్లౌడ్ నైన్’ అనే షార్ట్ ఫిలిమ్‌కు అవకాశం ఇచ్చారు. తర్వాత ‘పెళ్లి పుస్తకం’, ‘ప్రయాణం’ లాంటి షార్ట్ ఫిలిమ్స్‌కు పని చేశాను.

-భవిష్యత్తులో సినిమా చేస్తే తప్పకుండా కలిసి పనిచేద్దామని సుభాష్ అప్పుడే చెప్పారు.ఆ మాట నిలబెట్టుకున్నారు. అలా నాకు ‘‘గోదారి గట్టుపైన’ సినిమా వచ్చింది.నేను సాయి కార్తీక్, అనుప్ రూబెన్స్, జి.వి. ప్రకాష్, జస్టిన్ ప్రభాకర్ దగ్గర కీబోర్డ్ ప్లేయర్‌గా, అలాగే బ్యాక్‌గ్రౌండ్ స్కోర్‌లో పని చేశాను. వారందరి దగ్గర పని చేయడం వల్ల మంచి అనుభవం వచ్చింది.

‘గోదారి గట్టుపైన’ మ్యూజిక్ ఎలా ఉండబోతుంది?
-సుభాష్ సినిమాలన్నీ చాలా క్లీన్‌గా ఉంటాయి. ఫ్యామిలీ అందరూ కలిసి చూసేలా ఉంటాయి. ఈ సినిమా కూడా అలాగే వుంటనే మంచి కమర్షియల్ టచ్ కూడా ఉంది. ఆయన కథ చెప్పినప్పుడు నేను చాలా ఎక్సైట్ అయ్యాను. ఆయన అద్భుతమైన  సిచువేషన్స్  చెప్పారు.  దానికి తగ్గట్టు మ్యూజిక్ చేశాను. అవుట్‌పుట్ విషయంలో చాలా హ్యాపీగా ఉన్నాం. ఇందులో బ్రేకప్ యాంథమ్, అలాగే చిత్ర, ఎస్పీ చరణ్ పాడిన పాటలకు మంచి రెస్పాన్స్ రావడం చాలా ఆనందాన్ని ఇచ్చింది.

-ఇందులో ఒక రెట్రో సాంగ్ సిచువేషన్ ఉంది. దానికి సీనియర్ సింగర్స్ పాడితే బాగుంటుందని సుభాష్ గారితో చెప్పాను.ఆయనకి కూడా నచ్చింది. అలా చిత్ర, చరణ్ పాడారు. అది నా అదృష్టంగా భావిస్తున్నాను.చిత్ర  ట్యూన్ విని మెచ్చుకున్నారు. అలాంటి గొప్ప సింగర్స్ పాడటం వల్ల పాటకు మరింత విలువ పెరిగింది.

మ్యూజిక్‌లో మీకు ఇష్టమైన జానర్?
-నాకు మెలోడీస్ అంటే చాలా ఇష్టం. అదే నా స్ట్రెంత్ అని భావిస్తాను. ప్రతి పాటలో ఆ మెలోడీ మిస్ కాకుండా ప్రయత్నిస్తాను.

-సుభాష్ తో నా జర్నీ 15 ఏళ్లుగా ఉంది. ఈ సినిమా నా కెరీర్‌కు ఒక టర్నింగ్ పాయింట్ అవుతుందని భావిస్తున్నాను. ఇందులో బిట్ సాంగ్స్ కలిపి మొత్తం 7 పాటలు ఉన్నాయి. అన్నీ ప్రత్యేకంగా ఉంటాయి.

నా ఇన్స్పిరేషన్ ఇళయరాజా. ఆ తర్వాత రెహమాన్ గారు, మణిశర్మ గారు, హరీష్ జయరాజ్ అంటే చాలా ఇష్టం.

మీరు చేసిన ‘పెళ్లి పుస్తకం’ చాలా పాపులర్ కదా..ఆ సాంగ్ గురించి?
-2013లో ఆ పాట చేశాను. నిజంగా అది అంత సెన్సేషన్ అవుతుందని అనుకోలేదు. ఆ పాట చేసిన తర్వాతే నాకు పెళ్లి అయింది (నవ్వుతూ). మంచి పాట చేశామనే ఆనందం ఉంది.

‘గోదారి గట్టుపైన’ ఆల్బమ్‌లో మీకు టఫ్‌గా అనిపించిన పాట ఏది?
-ఒక ఎమోషనల్ సాంగ్ కోసం ట్యూన్ క్రాక్ చేయడానికి చాలా టైం పట్టింది. చివరకు మంచి ట్యూన్ వచ్చింది. అది ప్రేక్షకులకు ఖచ్చితంగా కనెక్ట్ అవుతుంది. ఆ పాటను కాలభైరవ గారు పాడారు.

-ప్రస్తుతం డిటిఎస్ మిక్సింగ్ జరుగుతోంది. సుభాష్ గారితో పని చేయడం చాలా హ్యాపీగా ఉంటుంది. ఆయన నాకు డైరెక్టర్ కంటే ఫ్రెండ్‌లా ఉంటారు.

ఈ కథ గురించి సింగిల్ లైన్‌లో చెప్పాలంటే?
-చాలా మంచి లవ్ స్టోరీ. కాన్ఫ్లిక్ట్ కూడా చాలా ఫ్రెష్‌గా ఉంటుంది. అందరికీ కనెక్ట్ అవుతుంది.

సుమంత్ ప్రభాస్ గురించి?
-సుమంత్ ప్రభాస్ తో ఇంతకుముందు ఒక వెబ్ సిరీస్‌కు పని చేశాను. అప్పటి నుంచి పరిచయం. ఈ సినిమా పాటలన్నీ ఆయన చాలా ఎంజాయ్ చేశారు.

షూటింగ్‌కు వెళ్లారా?
-ఒక పాట షూటింగ్‌కు వెళ్లాను. షూటింగ్ చూసిన తర్వాత మ్యూజిక్ చేయడమే హాయిగా అనిపించింది (నవ్వుతూ).

నిర్మాత గురించి?
-అభినవ్ చాలా పాషన్ ప్రొడ్యూసర్. మ్యూజిక్ కోసం కావలసిన ప్రతిదీ ఎక్కడా రాజీ పడకుండా అందించారు.ఈ సినిమా కోసం లైవ్ స్ట్రింగ్స్ ఉపయోగించాం. అవి చాలా ఖరీదైనవి. సాధారణంగా పాటల కోసం వాడడం కష్టం. కానీ ఆయన మేము అడిగిన ప్రతిదీ సమకూర్చారు.