అమరావతి: గుంటూరు నగరంలో స్పా మరియు మసాజ్ సెంటర్ ముసుగులో సాగుతున్న అసాంఘిక కార్యకలాపాలను జిల్లా టాస్క్ ఫోర్స్ పోలీసులు భగ్నం చేశారు. నల్లపాడు పోలీస్ స్టేషన్ పరిధిలోని ఇన్నర్ రింగ్ రోడ్డు, రెడ్డిపాలెం సమీపంలో ఉన్న ‘ఐరా స్పా’ (Aira Spa) సెంటర్‌పై గురువారం సాయంత్రం పోలీసులు ఆకస్మిక దాడులు నిర్వహించారు. కొంతకాలంగా ఇక్కడ మసాజ్ పేరుతో వ్యభిచార దందా జరుగుతోందని పోలీసులకు విశ్వసనీయ సమాచారం అందింది.

ఈ దాడుల్లో పోలీసులు స్పా మేనేజర్ సూర్య అనే వ్యక్తితో పాటు ముగ్గురు మహిళలను అదుపులోకి తీసుకున్నారు. పోలీసుల ప్రాథమిక విచారణలో, పట్టుబడిన మహిళల్లో ఇద్దరు ఇతర రాష్ట్రాలకు చెందిన వారని తేలింది. వీరికి వ్యభిచార దందాతో ఉన్న సంబంధాలపై పోలీసులు లోతుగా విచారిస్తున్నారు. స్పా ముసుగులో అమాయక మహిళలను ఈ రొంపిలోకి దింపుతున్నారా అనే కోణంలో కూడా దర్యాప్తు సాగుతోంది.

అదుపులోకి తీసుకున్న నలుగురిని తదుపరి విచారణ నిమిత్తం నల్లపాడు పోలీస్ స్టేషన్‌కు తరలించారు. పోలీసులు ఈ ఘటనపై కేసు నమోదు చేసి, ఈ దందా వెనుక ఇంకా ఎవరైనా పెద్ద తలకాయలు ఉన్నాయా అనే అంశంపై ఆరా తీస్తున్నారు. నగరంలో ఇలాంటి అసాంఘిక కార్యకలాపాలకు పాల్పడితే కఠిన చర్యలు తప్పవని పోలీసులు హెచ్చరించారు.