దోహా: ఖతార్ లోని హమద్ అంతర్జాతీయ విమానాశ్రయం (HIA)లో ఫ్లైట్ ట్రాఫిక్ నిర్వహణలో కార్యాచరణ సామర్థ్యాన్ని మరియు భద్రతను మెరుగుపరిచే లక్ష్యంతో డిజిటల్ రిమోట్ టవర్ వ్యవస్థను ఉపయోగించనున్నట్లు ఖతార్ సివిల్ ఏవియేషన్ అథారిటీ (QCAA) తెలిపింది.

డిజిటల్ రిమోట్ టవర్ హమద్ అంతర్జాతీయ విమానాశ్రయానికి పూర్తి 360-డిగ్రీల కవరేజీని అందిస్తుందన్నారు. అధునాతన నిఘా మరియు పర్యవేక్షణ సామర్థ్యాల ద్వారా కార్యాచరణ సామర్థ్యాన్ని మెరుగుపరచడానికి మరియు విమానాశ్రయ భద్రతను పెంచడానికి ఈ వ్యవస్థ దోహదపడుతుందని QCAA పేర్కొంది.

ఈ టవర్ వ్యవస్థలో రన్‌వే ఎయిర్ ట్రాఫిక్ మేనేజ్‌మెంట్‌కు మద్దతు ఇచ్చే స్క్రీన్‌లు, విమానాశ్రయ సౌకర్యాలన్నింటినీ కవర్ చేసేలా కెమెరాలు మరియు మెరుగైన ఫోటోల నాణ్యత కోసం అధునాతన హై-డెఫినిషన్ కదిలే కెమెరాలు ఉన్నాయని అథారిటీ వివరించింది. ఈ వ్యవస్థ విమానాలు మరియు వాహనాలను ఆటోమెటిక్ గా ట్రాక్ చేయడంతో పాటు, విమానాశ్రయ ప్రదేశాల మధ్య వేగవంతమైన నావిగేషన్‌ను కూడా అందిస్తుందని అథారిటీ పేర్కొంది.