మస్కట్: ఒమన్ లో ఎండలు దంచికొడుతున్నాయి. పలు ప్రాంతాల్లో ఉష్ణోగ్రతలు 48°C మార్కుకు చేరుకోవడంతో ప్రజలు బెంబేలెత్తిపోతున్నారు. సివిల్ ఏవియేషన్ అథారిటీ (CAA) విడుదల చేసిన డేటా ప్రకారం, గత 24 గంటల్లో దిమా వా అల్ తాయీన్‌లో 47.6°C అత్యధిక ఉష్ణోగ్రత నమోదైంది.

ఇతర అనేక ప్రాంతాలలో అధిక ఉష్ణోగ్రతలు నమోదయ్యాయి. అల్ రుస్తాఖ్ మరియు అల్ కామిల్ వా అల్ వాఫీలలో చెరో 47.4°C నమోదు కాగా, సుర్‌లో 47.3°C మరియు బిద్బిద్‌లో 47.2°C నమోదయ్యాయి. ఫాహుద్‌లో 47.0°C, బౌషర్‌లో 46.9°C, అల్ అమెరాత్‌లో 46.8°C ఉష్ణోగ్రతలు నమోదయ్యాయి.

అత్యంత వేడి ప్రదేశాల జాబితాలో ఉన్న సునైనాలో 46.6°C, నఖల్‌లో 46.5°C ఉష్ణోగ్రతలు నమోదయ్యాయి. ఒమన్ అంతటా వేసవి వాతావరణ తీవ్రత పెరుగుతోందని వాతావరణ శాఖ వెల్లడించింది. రాబోయే రోజుల్లో వేడి పరిస్థితులు కొనసాగే అవకాశం ఉన్నందున, అవసరమైన జాగ్రత్తలు తీసుకోవాలని, మధ్యాహ్నం వేళల్లో ఎక్కువసేపు నేరుగా ఎండలో ఉండకుండా ఉండాలని, అలాగే తగినంత నీరు తాగాలని వాతావరణ శాఖ అధికారులు సూచించారు.