మనామా: బహ్రెయిన్ లో తన ఇంట్లో పనిచేసే డొమెస్టిక్ వర్కర్ చెవి కొరికిన వ్యక్తికి హై క్రిమినల్ కోర్టు మూడు సంవత్సరాల జైలు శిక్ష విధించారు. అయితే, సదరు బహ్రెయిన్ వ్యక్తి మానసిక అనారోగ్యంతో బాధపడుతున్నట్లు అధికారులు తెలిపారు.  అతడి చర్యతో ఫిలిప్పీనా అయిన ఆ బాధితురాలు తన ఎడమ చెవిలో మూడింట ఒక వంతును కోల్పోవల్సి వచ్చింది.  ఈ గాయం వల్ల ఏడు శాతం వైకల్యం ఏర్పడినట్లు డాక్టర్లు నివేదికలో తెలిపారు.  

35 ఏళ్ల నిందితుడు గతంలో మానసిక వైద్య ఆసుపత్రిలో చికిత్స పొందినప్పటికీ, అతను పూర్తిగా కోలుకున్నాడని అతని కుటుంబం కోర్టులో వాధించారు. తమ సోదరుడు వింతగా ప్రవర్తించడానికి కారణం, ఆ పనిమనిషి 'మంత్రం వేయడమే' అని అతని సోదరీమణులు ఆరోపించారు.

కాగా, పబ్లిక్ ప్రాసిక్యూషన్ విచారణల సమయంలో ఆ వ్యక్తి ఆరోపణలను అంగీకరించాడు. కానీ ఆ సంఘటన పొరపాటున జరిగిందని వాదించాడు.

ఇదిలా ఉండగా, 47 ఏళ్ల ఫిలిప్పీనా మహిళ అంతకుముందు సాక్ష్యం ఇస్తూ, నిందితుడు ఎటువంటి కారణం లేకుండా వాగ్వాదాన్ని ప్రారంభించాడని, అది ముదిరి చివరికి తన చెవిలో కొంత భాగాన్ని కోల్పోయేలా చేసిందని తెలిపింది.