యూఏఈ: సౌదీ అరేబియాకు వెళ్లే విమానం ఎక్కడానికి సిద్ధమవుతున్న ఒక అరబ్ మహిళ పోగొట్టుకున్న బ్యాగ్‌ను, అందులోని విలువైన వస్తువులతో సహా దుబాయ్ పోలీసులు చివరి నిమిషంలో అందజేశారు. మానాశ్రయంలోని ఒక ప్రదేశంలో టెర్మినల్ 1 ఉద్యోగి ఒక నల్లటి బ్యాగ్‌ను గుర్తించి అధికారులకు అప్పగించడంతో ఈ సంఘటన వెలుగులోకి వచ్చింది.

ఆ బ్యాగ్‌లో 20,000 డాలర్లు, 150 గ్రాముల బంగారం, ఇతర కరెన్సీలు, వివిధ బ్రాండ్‌లకు చెందిన మొబైల్ ఫోన్లు మరియు వ్యక్తిగత పత్రాలు ఉన్నట్లు పోలీసులు గుర్తించారు.  పత్రాల ఆధారంగా సదరు మహిళను గుర్తించానికి ఒక ప్రత్యేక టీమ్ ను ఏర్పాటు చేశారు.

సదరు మహిళ సౌదీ అరేబియాకు వెళ్ళడానికి సిద్ధమవుతున్నట్లు గుర్తించారు. ఆమె తన బ్యాగ్ పోగొట్టుకుందని, ఏమీ చేయాలో తెలియక ఆందోళన చెందుతోందని, ఈ క్రమంలో తన విమానాన్ని కోల్పోతానేమోనని భయపడుతోందని పోలీసులు తెలిపారు.

మహిళను వెంటనే సంప్రదించి అవసరమైన చట్టపరమైన ప్రక్రియలను పూర్తి చేసి, ఆమె వద్ద అవసరమైన అన్ని అనుమతులు మరియు పత్రాలు ఉన్నాయని ధృవీకరించుకున్న తర్వాత ఆ బ్యాగ్‌ను ప్రయాణికురాలికి అప్పగించినట్లు దుబాయ్ పోలీసులు వెల్లడించారు.

ఇదేవిధంగా ఈ నెల ప్రారంభంలో దుబాయ్ అంతర్జాతీయ విమానాశ్రయం (DXB) టెర్మినల్ 1లో సుమారు 2 మిలియన్ దిర్హమ్‌ల విలువైన వెండి బార్ లు ఉన్న ఒక హ్యాండ్‌బ్యాగ్‌ను అధికారులు ఒక ఆసియా ప్రయాణికుడికి తిరిగి ఇచ్చారు. ఏప్రిల్ 22న, దుబాయ్ ఫ్రేమ్ సమీపంలో ఒక పర్యాటకుడు తన పాస్‌పోర్ట్ మరియు ఐఫోన్‌ను పోగొట్టుకున్న కొన్ని గంటల్లోనే వాటిని తిరిగి అందజేశారు. మొత్తంగా 2025లో 1,71,490 పోగొట్టుకున్న వస్తువులను వాటి యజమానులకు తిరిగి ఇచ్చినట్టు దుబాయ్ పోలీసులు తెలిపారు.