మనామా: ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) మరియు విలాయత్ అల్-ఫఖీహ్ సిద్ధాంతంతో సంబంధం ఉన్న 41 మందిని బహ్రెయిన్ అరెస్ట్ చేసింది. వీరిపై పబ్లిక్ ప్రాసిక్యూషన్ దర్యాప్తు ప్రారంభించిందని అడ్వకేట్ జనరల్ మరియు ఉగ్రవాద నేరాల ప్రాసిక్యూషన్ విభాగాధిపతి తెలిపారు. రద్దు చేయబడిన ఇస్లామిక్ పండితుల మండలి సభ్యులు ఈ సంస్థను ఏర్పాటు చేశారని, ఇది మాతృభూమి మరియు దాని రాజ్యాంగ వ్యవస్థ పట్ల విధేయత కంటే ఇరాన్‌లోని సర్వోన్నత న్యాయాధికారి పట్ల విధేయతను సమర్థిస్తుందని తెలిపారు. వారు పబ్లిక్ వేదికలను ఉపయోగించుకుని తమ భావజాలాన్ని వ్యాప్తి చేయడం ద్వారా, అలాగే దేశ ప్రయోజనాలకు వ్యతిరేకంగా రెచ్చగొట్టే ఉపన్యాసాలు ఇవ్వడం ద్వారా బహ్రెయిన్ అంతర్గత వ్యవహారాలలో ఇరాన్ జోక్యాన్ని సులభతరం చేయాలని లక్ష్యంగా పెట్టుకుంది.
ఇరాన్ సర్వోన్నత నాయకుడి పట్ల మతపరమైన, రాజకీయపరమైన విధేయతను వ్యాప్తి చేసే లక్ష్యంతో చేపట్టిన సంస్థ కార్యకలాపాలకు మద్దతు ఇవ్వడానికి, వాటికి ఆర్థిక సహాయం చేయడానికి నిధులను సేకరించి, వినియోగించారని ఆరోపణలు ఉన్నాయి. అశాంతిని రెచ్చగొట్టడం, ఉగ్రవాద చర్యలు, అల్లర్లు మరియు విధ్వంసక చర్యలకు మద్దతు ఇవ్వడం వంటి వాటికి కూడా ఈ నిధులను ఉపయోగించారని ఆరోపణలు ఉన్నాయి.
అరెస్టు చేసిన నలభై ఒక్క మంది అనుమానితులను పబ్లిక్ ప్రాసిక్యూషన్ విచారించిందని, వారిలో కొందరికి న్యాయ సలహాదారులు ప్రాతినిధ్యం వహించారని ప్రాసిక్యూటర్ పేర్కొన్నారు.విచారణ పూర్తయ్యే వరకు వారిని నిర్బంధంలో ఉంచాలని ప్రాసిక్యూషన్ ఆదేశించిందన్నారు.అలాగే, వారినుండి అధికారులు కొంత నగదుతో పాటువిలాయత్ అల్-ఫకీహ్ సిద్ధాంతాన్ని ప్రచారం చేసే అనేక సామగ్రిని కూడా స్వాధీనం చేసుకున్నారని వెల్లడించారు. జాతీయ భద్రత, ప్రజా భద్రత మరియు ఆర్థిక సమగ్రతను ప్రభావితం చేసే వివిధ నేరాలకు అనుమానితులు పాల్పడ్డారని దర్యాప్తులో తేలిందని వెల్లడించారు. కొంతమంది అనుమానితులు సేకరించిన నిధులను బంగారు ఆభరణాలు, స్థిరాస్తులు, వాహనాలు కొనడం, తమ పిల్లల విద్యా ఖర్చులు చెల్లించడం వంటి ప్రైవేట్ ప్రయోజనాలకు, వ్యక్తిగత ఖర్చులకు ఉపయోగించుకుని లబ్ధి పొందినట్లు దర్యాప్తులో తెలిసిందన్నారు. అరెస్టయిన వారిపై దర్యాప్తులు ఇంకా కొనసాగుతున్నాయని పబ్లిక్ ప్రాసిక్యూషన్ వెల్లడించింది.