దుబాయ్: దుబాయ్ పోలీసుల పాజిటివ్ స్పిరిట్ కౌన్సిల్ ఆధ్వర్యంలో నిర్వహిస్తున్న ‘షేడ్ అండ్ రివార్డ్’ కార్యక్రమం వరుసగా మూడో వారంలోనూ కొనసాగింది. వర్సాన్ ప్రాంతంలో పనిచేస్తున్న పారిశుద్ధ్య కార్మికులకు (క్లీనింగ్ ఇంజినీర్లు) అండగా నిలుస్తూ ఈ సేవా కార్యక్రమాన్ని నిర్వహించారు.

దుబాయ్ మున్సిపాలిటీ వ్యర్థాల నిర్వహణ బృందం, దుబాయ్ పోలీసుల మానవ హక్కుల విభాగం, ఆపరేషన్స్, ట్రాఫిక్, క్రిమినల్ ఇన్వెస్టిగేషన్స్, పోలీస్ స్టేషన్ల జనరల్ డిపార్ట్‌మెంట్‌ల సహకారంతో ఈ కార్యక్రమం నిర్వహించారు.

ఈ సందర్భంగా 150 మందికి పైగా పారిశుద్ధ్య కార్మికులు పాల్గొన్నారు. వారికి చల్లటి తాగునీరు, భోజనం, గొడుగులు పంపిణీ చేయడంతో పాటు వేసవి తీవ్రతలో ఆరోగ్య పరిరక్షణ, వృత్తి భద్రతపై అవగాహన కార్యక్రమాలు నిర్వహించారు.

వేసవి కాలంలో అధిక ఉష్ణోగ్రతల కారణంగా కలిగే హీట్ స్ట్రెస్ (వేడిమి ఒత్తిడి) ప్రమాదాలపై కార్మికులకు ప్రత్యేకంగా అవగాహన కల్పించారు. అధిక ఉష్ణోగ్రతలకు శరీరం ఎలా స్పందిస్తుందో, తీసుకోవాల్సిన జాగ్రత్తలు ఏమిటో వివరించారు. ఈ కార్యక్రమం జూన్ 15 నుంచి సెప్టెంబర్ 15 వరకు అమలులో ఉన్న మధ్యాహ్న విరామం (Midday Work Ban) విధానానికి అనుగుణంగా నిర్వహించినట్లు అధికారులు తెలిపారు.

పాజిటివ్ స్పిరిట్ కౌన్సిల్ చైర్‌పర్సన్ ఫాతిమా అహ్మద్ బుహజీర్ మాట్లాడుతూ, సమాజానికి సేవ చేస్తున్న ప్రతి వర్గాన్ని గౌరవించడం తమ బాధ్యత అని అన్నారు. నగర పరిశుభ్రత కోసం ప్రతిరోజూ శ్రమిస్తున్న పారిశుద్ధ్య కార్మికుల సేవలను గుర్తించి వారికి కృతజ్ఞత తెలియజేయడమే ఈ కార్యక్రమం ఉద్దేశమని పేర్కొన్నారు.

కార్మికుల ఆరోగ్యం, భద్రతను కాపాడడం ద్వారా వారి ఉత్పాదకత, పనితీరును మెరుగుపరచడం సాధ్యమవుతుందని, ఇది దుబాయ్‌లో మెరుగైన జీవన ప్రమాణాల సాధనలో కీలక భాగమని ఆమె తెలిపారు.

కార్యక్రమం ముగింపులో పారిశుద్ధ్య కార్మికులు ఈ మానవతా కార్యక్రమం నిర్వహించిన దుబాయ్ పోలీసులకు, భాగస్వామ్య సంస్థలకు కృతజ్ఞతలు తెలిపారు. ఇటువంటి కార్యక్రమాలు తమలో ఆత్మవిశ్వాసాన్ని పెంపొందించడంతో పాటు సమాజం తమ సేవలను గుర్తిస్తోందనే భావనను కలిగిస్తాయని వారు పేర్కొన్నారు.