రియాద్: సౌదీ అరేబియాలో ప్రవేశ వీసా (ఎంట్రీ వీసా) గడువు ముగిసిన తర్వాత కూడా దేశంలోనే ఉండే విదేశీయులపై కఠిన చర్యలు తీసుకుంటామని ఆ దేశ అంతర్గత వ్యవహారాల మంత్రిత్వ శాఖ హెచ్చరించింది. వీసా గడువు ముగిసిన తర్వాత దేశం విడిచి వెళ్లని వారికి గరిష్ఠంగా 50,000 సౌదీ రియాల్స్ జరిమానా, ఆరు నెలల వరకు జైలు శిక్ష, అనంతరం దేశం నుంచి బహిష్కరణ (డిపోర్టేషన్) విధిస్తామని స్పష్టం చేసింది.

అలాగే నివాస, కార్మిక, సరిహద్దు భద్రత నిబంధనల ఉల్లంఘనలకు సంబంధించిన సమాచారాన్ని ప్రజలు అధికారులకు అందించాలని మంత్రిత్వ శాఖ కోరింది. మక్కా, మదీనా, రియాద్, తూర్పు ప్రావిన్స్‌లలో 911కు, రాజ్యంలోని ఇతర ప్రాంతాల్లో 999కు ఫోన్ చేసి ఫిర్యాదులు నమోదు చేయాలని సూచించింది. వీసా నిబంధనలను తప్పనిసరిగా పాటించాలని, గడువు ముగిసేలోపే దేశం విడిచి వెళ్లాలని లేదా చట్టబద్ధంగా వీసాను పొడిగించుకోవాలని విదేశీయులకు సౌదీ అధికారులు సూచించారు.