సౌదీ అరేబియా, లెబనాన్‌ ద్వారా సిరియాకి వెళ్ళి అక్కడి తీవ్రవాద సంస్థల్లో చేరాలనుకున్న ముగ్గురు మహిళలు, ఏడుగురు పిల్లల్ని అడ్డుకున్నట్లు వెల్లడించింది. ముగ్గురు సోదరీమణులు, వారికి చెందిన పిల్లలు లెబనీస్‌ అధికారులకు బీరట్‌లో పట్టుబడ్డారు. వారిని సౌదీ అరేబియాకి తిరిగి పంపించారు. వీరిలో ఒకరి భర్త, పోలీసులకు సమాచారం అందించడంతో ఈ విషయం వెలుగు చూసింది. ఇస్లామిస్ట్‌ మిలిటెంట్స్‌ కోసం ఉపయోగించే 'తక్‌ఫిరి' పదాన్ని తన భార్యకు ఉపయోగిస్తూ ఆ వ్యక్తి పోలీసులను ఆశ్రయించాడు. సిరియాకి పొరుగు దేశాల నుంచి పెద్దయెత్తున వెళుతున్నవారంతా అక్కడి తీవ్రవాద సంస్థలతో జతకడ్తున్నారు. దాంతో సిరియా రక్తసిక్తమవుతోంది, ప్రపంచానికి సవాల్‌ విసురుతోంది. గడచిన 18 నెలల్లో 31,000 మందిని వివిధ దేశాల నుంచి తీసుకొచ్చి సిరియా తీవ్రవాద సంస్థల్లో రిక్రూట్‌ చేసుకున్నారనేది ఓ అంచనా.