రియాద్: మిడిలీస్టులో ఉద్రిక్తతలు పెరుగుతున్న నేపథ్యంలో సౌదీ అరేబియా, అమెరికా మధ్య రక్షణ రంగ సహకారాన్ని మరింత విస్తరించనున్నారు. ఈ మేరకు ఈ అంశంపై ఇరు దేశాల సైనిక ఉన్నతాధికారులు చర్చించారు.

సౌదీ అరేబియా సాయుధ దళాల చీఫ్ ఆఫ్ జనరల్ స్టాఫ్ జనరల్ ఫయ్యాద్ అల్-రువైలీ, అమెరికా సెంట్రల్ కమాండ్ (CENTCOM) డిప్యూటీ కమాండర్ లెఫ్టినెంట్ జనరల్ ప్యాట్రిక్ ఫ్రాంక్ ‌తో సమావేశమయ్యారు.

ఈ సందర్భంగా రక్షణ రంగంలోని వివిధ విభాగాల్లో ద్వైపాక్షిక సహకారాన్ని మరింత బలోపేతం చేయడం, ఉమ్మడి ప్రయోజనాలకు అనుగుణంగా రక్షణ భాగస్వామ్యాన్ని విస్తరించే అవకాశాలపై ఇరువురు అధికారులు సమీక్షించారు.

ప్రాంతీయ భద్రత, సైనిక సమన్వయం, వ్యూహాత్మక భాగస్వామ్యాన్ని మరింత బలోపేతం చేయాలనే లక్ష్యంతో ఈ సమావేశం జరిగినట్లు సౌదీ రక్షణ మంత్రిత్వ శాఖ విడుదల చేసిన ఒక ప్రకటనలో వెల్లడించింది.