రియాద్: సౌదీ అరేబియాలో రెసిడెన్సీ, లేబర్, సరిహద్దు భద్రతా చట్టాలను ఉల్లంఘించిన 15,836 మందిని గత వారం దేశవ్యాప్తంగా నిర్వహించిన సంయుక్త తనిఖీల సందర్భంగా అధికారులు అరెస్టు చేశారు. వీరిలో 7,892 మంది రెసిడెన్సీ , 4,617 మంది సరిహద్దు భద్రతా , 3,327 మంది కార్మిక చట్టాలను ఉల్లంఘించినట్లు సౌదీ అంతర్గత వ్యవహారాల మంత్రిత్వ శాఖ తెలిపింది. అదేవిధంగా, అక్రమంగా సౌదీలోకి ప్రవేశించేందుకు ప్రయత్నించిన 1,631 మందిని కూడా అరెస్టు చేశారు. వీరిలో 65 శాతం ఇథియోపియా, 33 శాతం యెమెన్ పౌరులు కాగా, మిగిలిన 2 శాతం ఇతర దేశాలకు చెందినవారు ఉన్నారు.

అక్రమంగా దేశం విడిచి వెళ్లేందుకు ప్రయత్నించిన 42 మందిని అదుపులోకి తీసుకోగా, అక్రమ వలసదారులకు రవాణా, ఆశ్రయం, ఉపాధి కల్పించడం లేదా వారిని దాచిపెట్టిన 21 మందిపై కూడా చర్యలు తీసుకున్నారు. ప్రస్తుతం 30,139 మంది (28,087 మంది పురుషులు, 2,052 మంది మహిళలు)పై చట్టపరమైన ప్రక్రియ కొనసాగుతోందని మంత్రిత్వ శాఖ తెలిపింది. వీరిలో 17,273 మందిని ప్రయాణ పత్రాల కోసం, 6,160 మందిని ప్రయాణ బుకింగ్‌ల కోసం సంబంధిత అధికారులకు పంపించగా, 12,211 మందిని దేశం నుంచి బహిష్కరించినట్లు వెల్లడించింది.

అక్రమంగా దేశంలోకి ప్రవేశించే వారికి సహకరించడం, రవాణా, ఆశ్రయం లేదా ఉపాధి కల్పించడం వంటి చర్యలకు పాల్పడిన వారికి 15 ఏళ్ల వరకు జైలు శిక్ష, SR1 మిలియన్ (10 లక్షల సౌదీ రియాల్స్) వరకు జరిమానా, అలాగే నేరానికి ఉపయోగించిన వాహనాలు, ఆస్తులను స్వాధీనం చేసుకునే శిక్షలు విధించవచ్చని సౌదీ అంతర్గత వ్యవహారాల మంత్రిత్వ శాఖ హెచ్చరించింది.

చట్ట ఉల్లంఘనలకు సంబంధించిన సమాచారం తెలిసిన వారు మక్కా, రియాద్, తూర్పు ప్రావిన్స్‌లలో 911, ఇతర ప్రాంతాల్లో 999 లేదా 996 నంబర్లకు సమాచారం అందించాలని మంత్రిత్వ శాఖ ప్రజలకు విజ్ఞప్తి చేసింది. సమాచారం ఇచ్చిన వారి వివరాలు పూర్తిగా గోప్యంగా ఉంచబడతాయని, వారికి ఎలాంటి చట్టపరమైన బాధ్యత ఉండదని స్పష్టం చేసింది.