దుబాయ్: "దుబాయ్‌లో ఎవరూ ఆకలితో ఉండకూడదు" అనే లక్ష్యంతో యూఏఈ ఉపాధ్యక్షుడు, ప్రధానమంత్రి, దుబాయ్ పాలకుడు హిజ్ హైనెస్ షేక్ మొహమ్మద్ బిన్ రషీద్ అల్ మక్తూమ్ ఆధ్వర్యంలో ప్రారంభమైన ‘బ్రెడ్ ఫర్ ఆల్’ (Bread for All) కార్యక్రమం వేలాది మంది కార్మికులు, తక్కువ ఆదాయం కలిగిన కుటుంబాలకు అండగా నిలుస్తోంది. నగరంలోని ఐదు కీలక ప్రాంతాల్లో ఏర్పాటు చేసిన స్మార్ట్ వెండింగ్ మెషీన్ల ద్వారా అవసరమైన వారికి ఉచితంగా తాజా బ్రెడ్‌తో పాటు వేడి భోజనం కూడా అందిస్తున్నారు.

2022లో ప్రారంభమైన ఈ కార్యక్రమం తొలుత తాజా అరబిక్ బ్రెడ్ (ఖుబ్జ్) పంపిణీకే పరిమితమైంది. అయితే ప్రజల అవసరాలను దృష్టిలో ఉంచుకుని గత ఏడాది నుంచి చికెన్ బిర్యానీ, చీజ్ పిజ్జా వంటి తాజాగా తయారు చేసిన భోజనాలను కూడా అందుబాటులోకి తీసుకొచ్చారు.

ఈ కార్యక్రమాన్ని మొహమ్మద్ బిన్ రషీద్ గ్లోబల్ సెంటర్ ఫర్ ఎండోమెంట్ కన్సల్టెన్సీ (MBRGCEC), దుబాయ్ అవ్కాఫ్ అండ్ మైనర్స్ ట్రస్ట్ ఫౌండేషన్ (Awqaf Dubai) ఆధ్వర్యంలో నిర్వహిస్తోంది. సమాజంలోని అవసరమైన వారికి గౌరవప్రదంగా, స్థిరమైన విధానంలో ఆహారం అందించాలనే ఉద్దేశంతో వక్ఫ్ (ధార్మిక దాతృత్వ నిధి) స్ఫూర్తితో ఈ కార్యక్రమాన్ని అమలు చేస్తున్నారు.

వేలాది మందికి ఉచితంగా ఆహారం

కార్యక్రమం ప్రారంభమైనప్పటి నుంచి వేలాది మంది కార్మికులు, డెలివరీ రైడర్లు, తక్కువ ఆదాయం కలిగిన ప్రజలకు ఉచితంగా బ్రెడ్, వేడి భోజనాన్ని అందించినట్లు ఎంబీఆర్‌జీసీఈసీ డైరెక్టర్ జైనబ్ అల్ తమీమీ తెలిపారు. ప్రజలు, దాతలు, స్వచ్ఛంద సంస్థలు ఈ కార్యక్రమానికి విశేషంగా సహకరిస్తున్నారని, గౌరవప్రదంగా సహాయం అందించే విధానం కారణంగా మంచి ఆదరణ లభిస్తోందని పేర్కొన్నారు.

ఎమిరేట్స్ ఐడీతో ఉచిత భోజనం

ఈ స్మార్ట్ వెండింగ్ మెషీన్ల నుంచి ఆహారం పొందాలంటే దుబాయ్ నివాసితులు తమ ఎమిరేట్స్ ఐడీని మెషీన్‌లో స్కాన్ చేసి, తమకు కావాల్సిన బ్రెడ్ లేదా భోజనాన్ని ఎంచుకుంటే సరిపోతుంది. రోజంతా మెషీన్లను పర్యవేక్షిస్తూ అవసరమైన మేరకు తాజా ఆహారాన్ని నిల్వ చేస్తున్నట్లు నిర్వాహకులు తెలిపారు.

ఆహార నాణ్యతకు ప్రత్యేక ప్రాధాన్యం

దుబాయ్ మున్సిపాలిటీ నిర్దేశించిన ఆహార భద్రత ప్రమాణాలకు అనుగుణంగా విశ్వసనీయ భాగస్వామ్య సంస్థలు తాజా ఆహారాన్ని తయారు చేసి సరఫరా చేస్తున్నాయి. వెండింగ్ మెషీన్లలో ఉష్ణోగ్రత నియంత్రణ వ్యవస్థలు ఉండటంతో బ్రెడ్, భోజనం ఎల్లప్పుడూ తాజాగా, సురక్షితంగా ఉండేలా చర్యలు తీసుకుంటున్నారు.

ఐదు ప్రాంతాల్లో సేవలు

ప్రస్తుతం ఈ స్మార్ట్ మెషీన్లు దుబాయ్‌లోని ఈ మసీదుల వద్ద అందుబాటులో ఉన్నాయి:

• అల్ ముత్తకీన్ మసీదు – అల్ ఖుసైస్ ఇండస్ట్రియల్ ఏరియా 3
• బిన్ సల్మీన్ మసీదు – అల్ ట్వార్ 5
• అల్ షహీద్ హసన్ అబ్దుల్లా బిలాల్ ఇస్మాయిల్ మసీదు – అల్ ట్వార్ 1
• అల్ ఫరూక్ ఒమర్ బిన్ అల్ ఖత్తాబ్ మసీదు – అల్ సఫా 1
• ఇబ్రహీం లూతా మసీదు – అల్ ముహైస్నా 3
• ప్రజల విరాళాలతో కొనసాగుతున్న సేవ

‘బ్రెడ్ ఫర్ ఆల్’ కార్యక్రమం పూర్తిగా ప్రజల విరాళాలపై ఆధారపడి కొనసాగుతోంది. బ్యాంక్ ట్రాన్స్‌ఫర్, ఆన్‌లైన్ చెల్లింపులు, ఎస్‌ఎంఎస్ ద్వారా కూడా విరాళాలు అందించే అవకాశం కల్పించారు. దీంతో సమాజంలోని మరింత మంది అవసరమైన వారికి ఆహారం అందించేందుకు ప్రజలు భాగస్వాములు కావచ్చు.

మరిన్ని ప్రాంతాలకు విస్తరణ

ఈ కార్యక్రమానికి వస్తున్న విశేష స్పందనతో దుబాయ్‌లో మరిన్ని ప్రాంతాలకు విస్తరించాలని నిర్వాహకులు నిర్ణయించారు. అలాగే మరిన్ని రకాల భోజనాలను అందుబాటులోకి తీసుకురావడం, భాగస్వామ్య సంస్థలను పెంచడం ద్వారా మరింత మంది లబ్ధిదారులకు సేవలు అందించాలనే లక్ష్యంతో ముందుకు సాగుతున్నట్లు జైనబ్ అల్ తమీమీ తెలిపారు.