కువైట్: ప్రైవేట్ ఫార్మసీల ఏర్పాటుకు సంబంధించి కువైట్ ప్రభుత్వం కీలక నిబంధనలు తీసుకొచ్చింది. ఆరోగ్య మంత్రి డాక్టర్ అహ్మద్ అల్ అవధీ జారీ చేసిన మంత్రిత్వ శాఖ తీర్మానం నంబర్ 235/2026 ద్వారా ప్రైవేట్ ఫార్మసీల లైసెన్సింగ్, నిర్వహణ, మందులు మరియు వైద్య ఉత్పత్తుల నిల్వకు సంబంధించి కొత్త మార్గదర్శకాలను ప్రకటించారు.
కొత్త నిబంధనల ప్రకారం.. ఇప్పటికే ఉన్న ఫార్మసీకి అన్ని దిశల్లో కనీసం 1,000 మీటర్ల దూరంలోనే కొత్త ఫార్మసీని ఏర్పాటు చేయాలి. అయితే కోఆపరేటివ్ సొసైటీలు, కమర్షియల్ కాంప్లెక్స్‌లు, విమానాశ్రయాలు, యూనివర్సిటీలు, ప్రైవేట్ ఆసుపత్రుల్లోని ఫార్మసీలకు కొన్ని మినహాయింపులు ఉంటాయి. ఇప్పటికే కొనసాగుతున్న ఫార్మసీలకు లైసెన్స్ రెన్యూవల్ లేదా ప్రాంత మార్పు సమయంలో నిబంధనలను సర్దుబాటు చేయనున్నారు.  

ఫార్మసీలు ప్రత్యామ్నాయ ప్రదేశాన్ని ఎంపిక చేసుకునేందుకు మూడు నెలల గడువు ఇవ్వనున్నారు. అవసరమైతే మరో మూడు నెలలు పొడిగించే అవకాశం ఉంటుంది.
ప్రైవేట్ ఫార్మసీ లైసెన్స్ నాలుగేళ్లపాటు చెల్లుబాటు అవుతుంది. ఫార్మసీలో ఉష్ణోగ్రత 25 డిగ్రీల సెల్సియస్ కంటే తక్కువగా ఉండాలి. రిఫ్రిజిరేషన్ అవసరమైన మందులను 2°C నుంచి 8°C మధ్య ఉష్ణోగ్రతలో నిల్వ చేయాలి. గడువు ముగిసిన మందులను ఇతర మందుల నుంచి వేరుగా, సురక్షితంగా ఉంచాలి.

ఫార్మసిస్టులపై కూడా నిబంధనలు

ప్రతి ఫార్మసీ యజమాని లైసెన్స్ కలిగిన మేనేజర్‌ను నియమించాలి. ఒక మేనేజర్ ఒకేసారి ఒకటి కంటే ఎక్కువ ఫార్మసీలను నిర్వహించకూడదు. అలాగే నాన్-కువైటీ ఫార్మసిస్టులను నియమించే ఫార్మసీల్లో కనీసం ఒక లైసెన్స్ కలిగిన కువైటీ ఫార్మసిస్ట్ తప్పనిసరిగా ఉండాలి. ఫార్మసిస్టులు, టెక్నీషియన్ల హాజరు, పని గంటల రికార్డులు నిర్వహించడంతో పాటు వారి పని గంటలపై నెలవారీ నివేదికలు సమర్పించాల్సి ఉంటుంది. కొత్త నిబంధనల ద్వారా కువైట్‌లో ప్రైవేట్ ఫార్మసీల లైసెన్సింగ్, మందుల నిల్వ, సిబ్బంది నిర్వహణపై పర్యవేక్షణను మరింత కఠినతరం చేయనున్నారు.