సౌదీలో అక్రమ నివాసులపై భారీ చర్యలు..!!
- November 22, 2026
రియాద్: సౌదీ అరేబియాలో అక్రమంగా నివసిస్తున్న విదేశీయులపై భద్రతా అధికారులు భారీ స్థాయిలో తనిఖీలు చేపట్టారు. నవంబర్ 12 నుంచి 18 వరకు వారం రోజుల్లో నిర్వహించిన సంయుక్త తనిఖీల్లో మొత్తం 10,783 మంది అక్రమ నివాసులను అరెస్ట్ చేసినట్లు సౌదీ అంతర్గత వ్యవహారాల మంత్రిత్వ శాఖ శనివారం వెల్లడించింది. ఇదే సమయంలో 11,915 మందిని దేశం నుంచి బహిష్కరించారు. అరెస్టయిన వారిలో 5,718 మంది నివాస చట్టం (Residency Law), 2,797 మంది సరిహద్దు భద్రతా చట్టం (Border Security Law), 2,268 మంది కార్మిక చట్టం (Labour Law) ఉల్లంఘించినవారు ఉన్నారు. మొత్తం 23,250 మందిని ప్రయాణ పత్రాలు పొందేందుకు వారి దేశాల దౌత్య కార్యాలయాలకు పంపించారు. మరో 10,814 మందికి స్వదేశాలకు వెళ్లేందుకు ప్రయాణ ఏర్పాట్లు పూర్తి చేసే ప్రక్రియ చేపట్టారు.
సౌదీ సరిహద్దుల ద్వారా అక్రమంగా దేశంలోకి ప్రవేశించేందుకు ప్రయత్నించిన 1,373 మందిని అధికారులు పట్టుకున్నారు. దేశం నుంచి అక్రమంగా బయటకు వెళ్లేందుకు ప్రయత్నించిన 28 మందిని కూడా అరెస్ట్ చేశారు. అక్రమ నివాసులకు రవాణా, ఆశ్రయం, ఉపాధి కల్పించిన 14 మందిని అదుపులోకి తీసుకున్నారు. ప్రస్తుతం 38,730 మంది పురుషులు, 2,211 మంది మహిళలు కలిపి మొత్తం 40,941 మంది విదేశీయులపై చట్టపరమైన చర్యలు తీసుకునే ప్రక్రియ కొనసాగుతోంది.
15 ఏళ్ల జైలు.. SR1 మిలియన్ జరిమానా
అక్రమంగా వ్యక్తులను సౌదీలోకి తీసుకురావడం, దేశంలో రవాణా చేయడం, ఆశ్రయం కల్పించడం లేదా ఇతరత్రా సహాయం అందించడం నేరమని అంతర్గత వ్యవహారాల మంత్రిత్వ శాఖ హెచ్చరించింది. ఇలాంటి చర్యలకు పాల్పడిన వారికి గరిష్ఠంగా 15 ఏళ్ల జైలు శిక్షతో పాటు SR1 మిలియన్ వరకు జరిమానా విధించవచ్చని తెలిపింది. అక్రమ రవాణాకు ఉపయోగించిన వాహనాలు, నిందితులకు ఆశ్రయం కల్పించిన ఇళ్లను కూడా స్వాధీనం చేసుకుంటామని స్పష్టం చేసింది.
అక్రమ నివాసులకు సంబంధించిన సమాచారం తెలిస్తే ప్రజలు అధికారులకు తెలియజేయాలని మంత్రిత్వ శాఖ కోరింది. మక్కా, రియాద్, తూర్పు ప్రావిన్స్ ప్రాంతాల్లో 911 నంబర్కు, ఇతర ప్రాంతాల్లో 999 లేదా 996 నంబర్లకు ఫోన్ చేసి ఫిర్యాదు చేయవచ్చని సూచించింది.
తాజా వార్తలు
- రష్యా పౌరుడిని ఎయిర్ లిఫ్ట్ చేసిన ఒమన్ ఎయిర్ ఫోర్స్..!!
- సౌదీలో అక్రమ నివాసులపై భారీ చర్యలు..!!
- ఖతార్లో ఇక పేపర్ సిక్లీవ్ సర్టిఫికెట్లకు సెలవు..!
- కువైట్లో 10 మంది అరెస్ట్, 6 వాహనాలు స్వాధీనం..!!
- ఇరాన్ దాడులపై UN కు బహ్రెయిన్ ఫిర్యాదు..!!
- GTA 6 గేమ్పై యూఏఈ హెచ్చరిక..!!
- దుబాయ్ మెట్రో బ్లూ లైన్ రైళ్ల కొత్త డిజైన్ను పరిశీలించిన షేక్ హమ్దాన్..
- తిరుమల శ్రీవారికి పారిశ్రామికవేత్త భారీ కానుక..
- ఇరాన్ వైమానిక దాడులను అడ్డుకున్న బహ్రెయిన్ రక్షణ వ్యవస్థలు
- షేక్ జాయెద్ రోడ్డు పై పరుగుల సందడి.. ఘనంగా దుబాయ్ రన్ 2026 ప్రారంభం







