షార్జా: ప్రజా రవాణా ప్రయాణికులకు మరింత సౌకర్యవంతమైన సేవలు అందించేందుకు షార్జా రోడ్స్ అండ్ ట్రాన్స్‌పోర్ట్ అథారిటీ (SRTA) కొత్త రియల్‌టైమ్ బస్‌ అరైవల్‌ సమాచార వ్యవస్థను ప్రారంభించింది. ఈ వ్యవస్థ ద్వారా బస్సు ఎన్ని నిమిషాల్లో బస్‌స్టాప్‌కు చేరుకుంటుందో ప్రయాణికులు ప్రత్యక్షంగా తెలుసుకోవచ్చు.

కొత్త డిజిటల్ డిస్‌ప్లేల్లో బస్సు రాక సమయాలు, సర్వీస్ అలర్ట్‌లు, తాజా మార్పులు రియల్‌టైమ్‌లో ప్రదర్శించనున్నారు. దీంతో ప్రయాణికులు తమ ప్రయాణాన్ని ముందుగానే ప్లాన్ చేసుకునే అవకాశం ఉంటుంది.

ఈ డిస్‌ప్లేలు సౌరశక్తితో పనిచేయడం మరో ప్రత్యేకత. షార్జాలో ఆధునీకరించిన, ఎయిర్ కండిషన్డ్ బస్‌స్టాప్‌లతో పాటు ప్రధాన బస్‌స్టేషన్లలో వీటిని ఏర్పాటు చేయనున్నారు.

ప్రజా రవాణా వ్యవస్థలో డిజిటల్ పరివర్తనను వేగవంతం చేయడం, సేవల నాణ్యతను మెరుగుపరచడం, ప్రయాణికులకు మరింత సౌకర్యవంతమైన, సమర్థవంతమైన, పర్యావరణహిత రవాణా అనుభవాన్ని అందించడమే ఈ ప్రాజెక్ట్ లక్ష్యమని అధికారులు తెలిపారు.

ఒమన్‌ బస్‌ సర్వీసులకు పెరిగిన డిమాండ్

ఇదిలా ఉండగా, షార్జా నుంచి ఒమన్‌కు నడిచే అంతర్‌ నగర బస్‌ సర్వీసులకు UAE నివాసితులు, పర్యాటకుల నుంచి డిమాండ్ పెరుగుతోంది. ఈ నేపథ్యంలో షార్జా అల్ జుబైల్ బస్‌స్టేషన్ నుంచి ఒమన్‌లోని సోహార్ మీదుగా మస్కట్‌కు వెళ్లే 203 నంబర్ రూట్‌ను రోజుకు మూడు ట్రిప్పులకు పెంచినట్లు SRTA గతంలో ప్రకటించింది.

సోహార్ నుంచి షార్జాకు రోజుకు రెండు బస్‌ సర్వీసులు, మస్కట్ నుంచి షార్జాకు రోజుకు ఒక సర్వీసు అందుబాటులో ఉంటాయి.