రియాద్: రద్దీగా ఉండే ప్రదేశాలు, అధిక ప్రమాదం ఉన్న కార్యకలాపాల కోసం థర్డ్ పార్టీ కోఆపరేటివ్ ఇన్సూరెన్స్ పాలసీని సౌదీ అరేబియా ప్రారంభించింది. ఇన్సూరెన్స్ అథారిటీ, జనరల్ డైరెక్టరేట్ ఆఫ్ సివిల్ డిఫెన్స్ సంయుక్తంగా ఈ పాలసీని ప్రకటించాయి. ఈ పాలసీ ద్వారా సంబంధిత సంస్థలకు సివిల్ లయబిలిటీ కవరేజ్ లభిస్తుంది. కవర్ అయ్యే ప్రదేశాల్లో ప్రమాదాల కారణంగా సందర్శకులు, వినియోగదారులకు గాయాలు కావడం లేదా వారి ఆస్తులకు నష్టం వాటిల్లినప్పుడు పరిహారం అందించేందుకు ఈ బీమా ఉపయోగపడుతుంది. సందర్శకుల హక్కులను రక్షించడంతో పాటు, ప్రమాదాల కారణంగా ఏర్పడే ఆర్థిక, నిర్వహణ భారాన్ని సంస్థలు సమర్థంగా ఎదుర్కొనేలా చేయడం ఈ పాలసీ ప్రధాన ఉద్దేశమని అధికారులు తెలిపారు.

తప్పనిసరి కానున్న బీమా

సంబంధిత కేబినెట్ నిర్ణయం ప్రకారం ఈ బీమా తప్పనిసరి కానుంది. తప్పనిసరి బీమా వర్తించే కార్యకలాపాలను నిర్వహించేందుకు జనరల్ డైరెక్టరేట్ ఆఫ్ సివిల్ డిఫెన్స్ లైసెన్స్ పొందాలంటే ఈ పాలసీ కీలక నిబంధనగా మారనుంది. కార్యకలాపాల స్వభావం, వాటికి సంబంధించిన ప్రమాద స్థాయిని బట్టి అందించే పరిహారం మారుతుంది. పాలసీలో పేర్కొన్న నిబంధనలు, షరతులు, మినహాయింపులకు అనుగుణంగా బీమా కవరేజ్ అమలవుతుంది. దీనిని దశలవారీగా అమలు చేయనున్నారు.

ఇన్సూరెన్స్ అథారిటీ సీఈఓ నాజీ అల్-తమీమీ మాట్లాడుతూ, ఈ పాలసీ వ్యాపారాల స్థిరత్వానికి మద్దతు ఇవ్వడంతో పాటు, బీమా తప్పనిసరి చేసిన రంగాల్లో పెట్టుబడుల ఆకర్షణను పెంచుతుందని తెలిపారు. ప్రమాదాల వల్ల కలిగే ఆర్థిక నష్టాన్ని తగ్గించుకోవడానికి సంస్థలకు ఈ బీమా సహాయపడుతుందని, తద్వారా కార్యకలాపాలను కొనసాగించడం, ప్రమాదాల అనంతరం త్వరగా కోలుకోవడం సులభమవుతుందని పేర్కొన్నారు. సౌదీ విజన్ 2030 లక్ష్యాలకు అనుగుణంగా దేశ ఆర్థిక వృద్ధి, పెట్టుబడుల విస్తరణకు ఈ విధానం దోహదపడుతుందని వెల్లడించారు.