మస్కట్‌: ఒమన్‌లోని ఇండియన్‌ సోషల్‌ క్లబ్‌ (ISC Oman) ఆధ్వర్యంలో భారత 80వ స్వాతంత్ర్య దినోత్సవ వేడుకలు ఘనంగా నిర్వహించారు. ఒమన్‌లోని భారతీయులు పెద్ద సంఖ్యలో పాల్గొన్న ఈ కార్యక్రమం దేశభక్తి, సాంస్కృతిక ప్రదర్శనలు, సంగీతం, ఐక్యతా స్ఫూర్తితో సందడిగా సాగింది. ఈ కార్యక్రమానికి ఒమన్‌లో భారత రాయబారి ప్రశాంత్‌ పిసే ముఖ్య అతిథిగా హాజరయ్యారు. కిరణ్‌ ఆశర్‌, డాక్టర్‌ మహ్మద్‌ అలీ, అఫ్తాబ్‌ పటేల్‌, మోనిష్‌ బెహల్‌ తదితర ప్రముఖులు పాల్గొన్నారు. ఈ సందర్భంగా భారతీయులకు రాయబారి స్వాతంత్ర్య దినోత్సవ శుభాకాంక్షలు తెలిపారు. కార్యక్రమానికి స్వాగతం పలికిన ఇండియన్‌ సోషల్‌ క్లబ్‌ ఒమన్‌ చైర్మన్‌ సుహైల్‌ ఖాన్‌ మాట్లాడుతూ.. స్వాతంత్ర్య దినోత్సవ శుభాకాంక్షలు తెలిపారు.

వేడుకల్లో భాగంగా బాల్విందర్‌ సింగ్‌కు ‘ఇండియన్‌ ఆఫ్‌ ది ఇయర్‌’ అవార్డు** అందజేశారు. సమాజ సేవ, దాతృత్వ కార్యక్రమాల్లో ఆయన చేసిన విశేష కృషికి గుర్తింపుగా ఈ పురస్కారం అందించారు. దశాబ్దాలుగా బాల్విందర్‌ సింగ్‌ నిరంతరం సేవా, స్వచ్ఛంద కార్యక్రమాల్లో పాల్గొంటూ ఎంతోమందికి అండగా నిలిచారని నిర్వాహకులు తెలిపారు. అవార్డు అందుకున్న సందర్భంగా ఆయన భావోద్వేగానికి లోనై.. ఈ గౌరవం తనకు ఎంతో ప్రత్యేకమని పేర్కొన్నారు.

ఆకట్టుకున్న సాంస్కృతిక కార్యక్రమాలు

స్వాతంత్ర్య వేడుకల్లో భాగంగా ఇండియన్‌ సోషల్‌ క్లబ్‌కు చెందిన మస్కట్‌ సింగర్స్‌ – ఓపెన్‌ మైక్‌ గ్రూప్‌ దేశభక్తి గీతాలను ఆలపించింది. వివిధ ఐఎస్‌సీ గ్రూపులు నిర్వహించిన పలు నృత్య, సంగీత ప్రదర్శనలు ప్రేక్షకులను ఆకట్టుకున్నాయి. భారత్‌లోని వివిధ ప్రాంతాల సంస్కృతిని ప్రతిబింబించేలా ఇండియన్‌ సోషల్‌ క్లబ్‌కు చెందిన 16 లింగ్విస్టిక్‌ వింగ్స్‌ జానపద, సాంస్కృతిక ప్రదర్శనలు నిర్వహించాయి. దీంతో ఒమన్‌లోని భారతీయుల ‘భిన్నత్వంలో ఏకత్వం’ స్ఫూర్తి మరోసారి ప్రతిబింబించింది. అలాగే ఐఎస్‌సీ కళాకారుల బృందం ‘రంగ్‌రేజ్‌’ ఆధ్వర్యంలో పెయింటింగ్స్‌ ప్రదర్శన ఏర్పాటు చేశారు.