దోహా: డ్రోన్ల వినియోగాన్ని నియంత్రించే కొత్త చట్టంపై ఖతార్ పౌర విమానయాన సంస్థ (QCAA) ప్రజలకు అవగాహన కల్పించింది. 2026 నంబర్ 10 చట్టం కింద డ్రోన్ల వినియోగానికి సంబంధించిన నిబంధనలు, అవసరాలపై ఆగస్టు 19న ప్రత్యేక అవగాహన కార్యక్రమాన్ని నిర్వహించింది.

ఈ కార్యక్రమంలో డ్రోన్ల వినియోగానికి సంబంధించిన చట్టంలోని ప్రధాన నిబంధనలను అధికారులు వివరించారు. డ్రోన్ టెక్నాలజీ వేగంగా అభివృద్ధి చెందుతున్న నేపథ్యంలో.. వాణిజ్య, పరిశోధన, వినోద రంగాల్లో వీటి వినియోగం పెరుగుతున్నందున వాటి కార్యకలాపాలను క్రమబద్ధీకరించేందుకు కొత్త చట్టాన్ని తీసుకొచ్చినట్లు తెలిపారు. డ్రోన్లను సురక్షితంగా, నిబంధనలకు అనుగుణంగా వినియోగించడంపై ప్రజలకు అవగాహన కల్పించడమే కార్యక్రమం ప్రధాన ఉద్దేశమని QCAA పేర్కొంది.

డ్రోన్ టెక్నాలజీ అందించే అవకాశాలను సద్వినియోగం చేసుకోవడంతో పాటు.. విమాన రాకపోకల భద్రత, ఖతార్ గగనతల రక్షణకు ఎలాంటి ముప్పు వాటిల్లకుండా సమతుల్యత పాటించాల్సిన అవసరాన్ని అధికారులు వివరించారు.

కొత్త చట్టంలోని నిబంధనలు, అనుమతులు, అవసరమైన భద్రతా ప్రమాణాలపై ప్రజలకు అవగాహన పెంచడం ద్వారా ఖతార్‌లో డ్రోన్ కార్యకలాపాలను మరింత సురక్షితంగా, క్రమబద్ధంగా నిర్వహించేందుకు చర్యలు తీసుకుంటున్నట్లు QCAA వెల్లడించింది.