కువైట్: ఇరాన్ దాడులు, ప్రాంతీయంగా గగనతల మూసివేతల నేపథ్యంలో గతంలో కల్పించిన ప్రత్యేక వెసులుబాట్లను కువైట్ ప్రభుత్వం ముగించనుంది. 2026 సెప్టెంబర్ 1 నుంచి విజిట్ వీసాలు, అబ్సెన్స్ పర్మిట్లకు సంబంధించిన సాధారణ నిబంధనలను తిరిగి అమలు చేయనున్నట్లు కువైట్ అంతర్గత వ్యవహారాల మంత్రిత్వ శాఖ ప్రకటించింది.

2026 ఫిబ్రవరిలో అమెరికా-ఇరాన్ యుద్ధం ప్రారంభమైన అనంతరం కువైట్‌తో పాటు పలు గల్ఫ్ దేశాలు డ్రోన్లు, క్షిపణి దాడులను ఎదుర్కొన్నాయి. ఈ నేపథ్యంలో ప్రాంతీయ గగనతల మూసివేతలు, భద్రతాపరమైన ఆందోళనల కారణంగా మార్చిలో కువైట్‌లో ఉన్న సందర్శకులకు ప్రత్యేకంగా ఆటోమేటిక్ వీసా పొడిగింపులు ప్రకటించారు.

అలాగే కువైట్ వెలుపల ఉండి, పరిస్థితుల కారణంగా దేశానికి తిరిగి రాలేకపోయిన ప్రవాసులకు మూడు నెలల అబ్సెన్స్ పర్మిట్ పొడిగింపు ఇచ్చారు. ఇందుకోసం వ్యక్తిగతంగా కార్యాలయాలకు హాజరు కావాల్సిన అవసరం లేకపోగా, ఫీజుల నుంచి కూడా పూర్తిగా మినహాయింపు కల్పించారు.

కువైట్‌లో సాధారణంగా ప్రవాసులు ఆరు నెలలకు మించి దేశం వెలుపల ఉంటే వారి రెసిడెన్సీ చెల్లుబాటుపై ప్రభావం పడకుండా ఉండేందుకు అబ్సెన్స్ పర్మిట్ అవసరం. ఈ అనుమతిని సాధారణంగా Sahel యాప్ లేదా రెసిడెన్సీ అఫైర్స్ విభాగాల ద్వారా పొందవచ్చు.

ఆగస్టు 31 వరకు వెళ్లిన వారికి ప్రత్యేక వెసులుబాటు
ఆగస్టు 20న కువైట్ అంతర్గత వ్యవహారాల మంత్రిత్వ శాఖ తాజా ప్రకటనలో.. సెప్టెంబర్ 1, 2026 నుంచి విజిట్ వీసాలు, అబ్సెన్స్ పర్మిట్లకు సాధారణంగా అమలయ్యే చట్టబద్ధ కాలపరిమితులు పునరుద్ధరించబడతాయని తెలిపింది.

అయితే 2026 ఆగస్టు 31 లేదా అంతకుముందు కువైట్ నుంచి వెళ్లిన నివాసితులకు అదనంగా ఇచ్చిన అబ్సెన్స్ పర్మిట్ గడువు మాత్రం కొనసాగుతుంది అని స్పష్టం చేసింది.

రెసిడెంట్ అబ్సెన్స్ పర్మిట్ గడువు ఎప్పుడు ముగుస్తుందో నిర్ణయించేందుకు Sahel యాప్ ద్వారా జారీ చేసిన రెసిడెన్సీ పర్మిట్ సర్టిఫికెట్‌నే అధికారిక, ఆమోదిత ఆధారంగా పరిగణిస్తామని మంత్రిత్వ శాఖ తెలిపింది.

ప్రవాసులు తమ అబ్సెన్స్ పర్మిట్‌లో పేర్కొన్న గడువును తప్పనిసరిగా పాటించి, నిర్దేశిత వ్యవధిలో కువైట్‌కు తిరిగి రావాలని అధికారులు సూచించారు.