అమెరికా పర్యటనకు కేంద్రం అనుమతి నిరాకరించడంతో సీఎం రేవంత్‌ రెడ్డి తన పర్యటనను రద్దు చేసుకున్నారు. ప్రస్తుతం లండన్‌లో ఉన్న రేవంత్‌.. బోస్టన్‌, ఇతర నగరాల్లో పర్యటించాల్సి ఉండగా, అనుమతి రాకపోవడంతో అమెరికా వెళ్లకుండా హైదరాబాద్‌కు తిరిగి రానున్నారు.

రాజకీయ కోణంలో క్లియరెన్స్‌ నిరాకరించారు అని సీఎంవో వెల్లడించింది. ప్రపంచంలోని ప్రముఖ విద్యా సంస్థలను తెలంగాణకు తీసుకురావడం, యువతకు మెరుగైన విద్య, నైపుణ్య శిక్షణ అందించడమే అమెరికా పర్యటన ఉద్దేశమని రేవంత్‌ తెలిపారు. అయితే సీఎం పర్యటన రద్దయినా.. అధికారులు మాత్రం అమెరికా వెళ్లి ప్రతిపాదిత ఒప్పందాలు, భాగస్వామ్యాలపై చర్చలు కొనసాగించనున్నారు.

లండన్‌లో రేవంత్‌ తన షెడ్యూల్‌ ప్రకారం ఆక్స్‌ఫర్డ్‌, కేంబ్రిడ్జ్‌, లండన్‌ స్కూల్‌ ఆఫ్‌ ఎకనామిక్స్‌, లండన్‌ బిజినెస్‌ స్కూల్‌, యూనివర్సిటీ ఆఫ్‌ లండన్‌ ప్రతినిధులతో భేటీ కానున్నారు. హైదరాబాద్‌ను ప్రపంచ స్థాయి విద్య, నైపుణ్యాల కేంద్రంగా తీర్చిదిద్దడమే లక్ష్యమని సీఎం పేర్కొన్నారు.