గుడివాడ: గుడివాడ ప్రభుత్వ ఆసుపత్రిలో ప్రజలకు మెరుగైన వైద్య సేవలు అందించేందుకు ఏర్పాటు చేసిన అత్యాధునిక సీటీ స్కాన్ యంత్రంతో పాటు సోలార్ పవర్ సదుపాయాన్ని మచిలీపట్నం పార్లమెంట్ సభ్యులు వల్లభనేని బాలశౌరి ప్రారంభించారు.

స్థానిక శాసనసభ్యులు వెనిగండ్ల రాముతో కలిసి ఎంపీ బాలశౌరి ఈ సదుపాయాలను ప్రారంభించారు.గుడివాడ ప్రభుత్వ ఆసుపత్రిలో రూ.1.85 కోట్ల వ్యయంతో సీటీ స్కాన్ యంత్రాన్ని, రూ.76.60 లక్షల వ్యయంతో సోలార్ పవర్ సదుపాయాన్ని ఏర్పాటు చేశారు.

ఈ సందర్భంగా ఎంపీ బాలశౌరి మాట్లాడుతూ ప్రభుత్వ ఆసుపత్రుల్లో ఆధునిక వైద్య సదుపాయాలను అందుబాటులోకి తీసుకురావడం ద్వారా పేద, మధ్యతరగతి ప్రజలకు మెరుగైన వైద్యం అందించేందుకు అవకాశం కలుగుతుందని అన్నారు. సీటీ స్కాన్ సేవలు అందుబాటులోకి రావడంతో ఖరీదైన ప్రైవేట్ ఆసుపత్రులకు వెళ్లాల్సిన అవసరం లేకుండా స్థానికంగానే అవసరమైన వైద్య పరీక్షలు చేయించుకునే అవకాశం ప్రజలకు లభిస్తుందని పేర్కొన్నారు.

అదేవిధంగా సోలార్ పవర్ సదుపాయం ద్వారా ఆసుపత్రి విద్యుత్ అవసరాల్లో కొంత భాగాన్ని సౌర విద్యుత్‌తో తీర్చుకోవడంతో పాటు నిర్వహణ వ్యయాన్ని తగ్గించేందుకు దోహదపడుతుందని తెలిపారు.

గుడివాడ ప్రభుత్వ ఆసుపత్రిలో ఆధునిక మౌలిక సదుపాయాల కల్పనతో స్థానిక ప్రజలకు మెరుగైన వైద్య సేవలు అందుబాటులోకి రావడం పట్ల ప్రజలు హర్షం వ్యక్తం చేశారు.