దుబాయ్: 2026-27 విద్యా సంవత్సరంలో దుబాయ్‌లో 26 కొత్త ప్రైవేట్ విద్యా సంస్థలు ప్రారంభం కానున్నాయి. వీటిలో ఏడు కొత్త పాఠశాలలు ఉండగా, దాదాపు 17,000 కొత్త సీట్లు అందుబాటులోకి రానున్నాయి. కొత్తగా ప్రారంభమయ్యే సంస్థల్లో 17 ప్రైవేట్ ఎర్లీ చైల్డ్‌హుడ్ సెంటర్లు (ECCs) కూడా ఉన్నాయి. వీటి ద్వారా 1,700కుపైగా ప్రారంభ దశ విద్యా సీట్లు అందుబాటులోకి రానున్నాయి. మరో రెండు అంతర్జాతీయ ఉన్నత విద్యా సంస్థలు కూడా దుబాయ్‌లో కార్యకలాపాలు ప్రారంభించనున్నాయి. గత మూడు విద్యా సంవత్సరాల్లో దుబాయ్ ప్రైవేట్ విద్యా రంగం పాఠశాలలు, ప్రారంభ బాల్య విద్య, ఉన్నత విద్య విభాగాల్లో కలిపి 4.6 శాతం వార్షిక వృద్ధి నమోదు చేసింది.

కొత్తగా ప్రారంభమయ్యే ఏడు పాఠశాలల్లో నాలుగు బ్రిటిష్ కరిక్యులమ్, మూడు ఇంటర్నేషనల్ బాకలారియేట్ (IB) కరిక్యులమ్‌ను అందించనున్నాయి. కొత్త పాఠశాలల్లో ఇప్పటికే అంతర్జాతీయంగా గుర్తింపు పొందిన బ్రిటిష్ సంస్థల క్యాంపస్‌లు కూడా ఉన్నాయి. వీటిలో హారో ఇంటర్నేషనల్ స్కూల్ దుబాయ్, క్వీన్ ఎలిజబెత్ స్కూల్ దుబాయ్ స్పోర్ట్స్ సిటీ, రగ్బీ స్కూల్ దుబాయ్ ఉన్నాయి. గత మూడు సంవత్సరాల్లో దుబాయ్ ప్రైవేట్ స్కూల్ రంగంలో 21 కొత్త పాఠశాలలు ప్రారంభమయ్యాయి. ఇదే సమయంలో విద్యార్థుల నమోదు 3.1 శాతం పెరిగింది.

కొత్తగా ప్రారంభమయ్యే 17 ECCల్లో యూకే ఎర్లీ ఇయర్స్ ఫౌండేషన్ స్టేజ్, మాంటెసోరి, ఒంటారియో, ఫ్రెంచ్, ఇండియన్ విద్యా కార్యక్రమాలు అందుబాటులో ఉండనున్నాయి. గత మూడు సంవత్సరాల్లో దుబాయ్‌లో 87 కొత్త ECCలు ప్రారంభమయ్యాయి. ఈ విభాగంలో విద్యార్థుల నమోదు 2.6 శాతం పెరిగింది. విద్యా రంగం విస్తరణతో ఉపాధ్యాయులకు కూడా అవకాశాలు పెరుగుతున్నాయి. గత మూడు విద్యా సంవత్సరాల్లో దుబాయ్ ప్రైవేట్ విద్యా రంగంలో పనిచేస్తున్న విద్యావేత్తల సంఖ్య 17.5 శాతం పెరిగింది.

దుబాయ్‌లో కొత్త యూనివర్సిటీ అవకాశాలు

ఉన్నత విద్యా రంగంలోనూ దుబాయ్ మరిన్ని అవకాశాలను అందుబాటులోకి తీసుకురానుంది. అమెరికన్ యూనివర్సిటీ ఆఫ్ బీరూట్ దుబాయ్ క్యాంపస్ 2026 సెప్టెంబర్‌లో ప్రారంభం కానుంది. అదేవిధంగా పీకింగ్ యూనివర్సిటీ HSBC బిజినెస్ స్కూల్ 2027 జనవరిలో MBA, EMBA ప్రోగ్రామ్‌లను ప్రారంభించనుంది. గత మూడు సంవత్సరాల్లో దుబాయ్ ఉన్నత విద్యా రంగంలో 11 కొత్త సంస్థలు ప్రారంభమయ్యాయి. ఈ కాలంలో విద్యార్థుల నమోదు ఏకంగా 29 శాతం పెరిగింది.

దుబాయ్ నాలెడ్జ్ అండ్ హ్యూమన్ డెవలప్‌మెంట్ అథారిటీ (KHDA) డైరెక్టర్ జనరల్ ఆయిషా మిరాన్ మాట్లాడుతూ.. విద్యా రంగంలో నిరంతర విస్తరణపై కుటుంబాలు, విద్యా సంస్థలు, పెట్టుబడిదారులకు ఉన్న విశ్వాసాన్ని ఇది ప్రతిబింబిస్తోందన్నారు. ఎడ్యుకేషన్ 33 స్ట్రాటజీ ద్వారా విద్యార్థులకు మరిన్ని ఎంపికలు కల్పించడం, ప్రతిభను ప్రోత్సహించడం, ప్రపంచ స్థాయి విద్యా సంస్థలను ఆకర్షించడం, భవిష్యత్తుకు అవసరమైన నైపుణ్యాలను అందించడం లక్ష్యంగా దుబాయ్ ముందుకు సాగుతోందని తెలిపారు.