రియాద్‌: కొత్త విద్యా సంవత్సరం ప్రారంభం నేపథ్యంలో విద్యార్థుల రవాణా సేవలను అందించే లైసెన్స్‌ పొందిన, అధికారికంగా అనుమతి ఉన్న ఆపరేటర్లతోనే పేరెంట్స్ డీల్స్ చేసుకోవాలని సౌదీ అరేబియా ట్రాన్స్‌పోర్ట్ జనరల్ అథారిటీ (TGA) సూచించింది. విద్యార్థుల భద్రతకు అత్యంత ప్రాధాన్యత ఇస్తున్నట్లు తెలిపింది.

వివిధ మార్గాలు, సదుపాయాల ద్వారా అందుబాటులో ఉన్న నియంత్రిత, లైసెన్స్‌ పొందిన విద్యార్థుల రవాణా సేవలను తల్లిదండ్రులు వినియోగించుకోవాలని TGA కోరింది. అనుమతి లేని రవాణా ఆపరేటర్లను ఆశ్రయించవద్దని హెచ్చరించింది. ఇలాంటి సేవలు విద్యార్థుల భద్రతకు ప్రమాదం కలిగించే అవకాశం ఉందని పేర్కొంది.

లైసెన్స్‌ బస్సులను ఎలా గుర్తించాలి?

లైసెన్స్‌ పొందిన విద్యార్థుల రవాణా బస్సులను సులభంగా గుర్తించేందుకు పలు ప్రత్యేక గుర్తులు ఉంటాయని TGA తెలిపింది. ఎల్లో కలర్ నంబర్‌ ప్లేట్‌, బస్సుకు ఇరువైపులా స్టాప్‌ ఆర్మ్‌, కస్టమర్‌ సర్వీస్‌ సంప్రదింపు నంబర్‌, బస్సు ముందు, వెనుక భాగాల్లో సర్వీస్‌ ప్రొవైడర్‌ లైసెన్స్‌ నంబర్‌, ఆపరేటింగ్‌ కార్డ్‌ నంబర్‌, బస్సు నంబర్‌ ద్వారా గుర్తించవచ్చని పేర్కొంది.

కొత్త విద్యా సంవత్సరం ప్రారంభమైన నేపథ్యంలో విద్యార్థుల రవాణా రంగంపై TGA తనిఖీలు, పర్యవేక్షణను కొనసాగిస్తోంది. చట్టాలు, నిబంధనలు, నిర్దేశిత ప్రమాణాలు అమలవుతున్నాయో పరిశీలించడంతోపాటు ఉల్లంఘనలను గుర్తించి అవసరమైన నియంత్రణ చర్యలు తీసుకుంటున్నట్లు అధికారులు తెలిపారు.