అబుదాబి: ఎలాన్ మస్క్‌కు చెందిన స్టార్‌లింక్ సంస్థకు యూఏఈ ప్రభుత్వం 10 ఏళ్ల జనరల్ శాటిలైట్ సర్వీసెస్ లైసెన్స్ మంజూరు చేసింది. దీంతో దేశంలో పబ్లిక్ శాటిలైట్ టెలికమ్యూనికేషన్ నెట్‌వర్క్‌ను ఏర్పాటు చేయడం, నిర్వహించడం, శాటిలైట్ ఆధారిత బ్రాడ్‌బ్యాండ్ ఇంటర్నెట్ సేవలను అందించడం కోసం స్టార్‌లింక్‌కు అధికారిక అనుమతి లభించింది.

ఈ లైసెన్స్‌ను టెలికమ్యూనికేషన్స్ అండ్ డిజిటల్ గవర్నమెంట్ రెగ్యులేటరీ అథారిటీ (TDRA) నిర్దేశించిన నియంత్రణ, సాంకేతిక ప్రమాణాలకు అనుగుణంగా మంజూరు చేసింది. అవసరమైన నిబంధనలు, షరతులను స్టార్‌లింక్ పూర్తి చేయాల్సి ఉంటుంది.

వ్యక్తులు, సంస్థలకు శాటిలైట్ ఇంటర్నెట్

స్టార్‌లింక్ అందించే సేవలు వ్యక్తిగత వినియోగదారులతో పాటు వ్యాపార సంస్థలు, ప్రభుత్వ సంస్థలకు అందుబాటులోకి రానున్నాయి. అంతేకాకుండా సముద్ర రవాణా, విమానయాన రంగాలకు కూడా శాటిలైట్ కనెక్టివిటీ సేవలను అందించనుంది.

శాటిలైట్ ఆధారిత ఇంటర్నెట్ సేవలు యూఏఈలో ఇప్పటికే ఉన్న ఫైబర్-ఆప్టిక్, 5G నెట్‌వర్క్‌లకు అదనపు కనెక్టివిటీ పొరగా పనిచేయనున్నాయి.

ఇంటర్నెట్ సేవలకు మరిన్ని ప్రత్యామ్నాయాలను అందించడంతో పాటు జాతీయ డిజిటల్ నెట్‌వర్క్ సామర్థ్యం, స్థిరత్వం, అత్యవసర పరిస్థితుల్లో సేవల కొనసాగింపును మరింత బలోపేతం చేయడంలో ఈ సేవలు కీలకంగా మారనున్నాయి.

కీలక రంగాలకు ప్రయోజనం

మారిటైమ్, ఏవియేషన్, ఇంధన, లాజిస్టిక్స్, అత్యవసర సేవలు వంటి కీలక రంగాల్లో నమ్మకమైన కనెక్టివిటీని అందించేందుకు స్టార్‌లింక్ సేవలు దోహదపడతాయని అధికారులు తెలిపారు.

కొత్త సాంకేతికతలను స్వీకరించేలా, వినియోగదారులకు మరిన్ని కనెక్టివిటీ ఎంపికలు అందించేలా, టెలికమ్యూనికేషన్ రంగంలో పోటీని ప్రోత్సహించేలా యూఏఈ నియంత్రణ విధానం కొనసాగుతోందని TDRA పేర్కొంది.

టెలికాం రంగంలో కీలక ముందడుగు

TDRA డైరెక్టర్ జనరల్ మాజిద్ సుల్తాన్ అల్ మెస్మార్ మాట్లాడుతూ.. స్టార్‌లింక్‌కు లైసెన్స్ మంజూరు చేయడం యూఏఈ టెలికమ్యూనికేషన్ రంగానికి కీలకమైన అదనపు బలమని అన్నారు.

అధునాతన శాటిలైట్ ఇంటర్నెట్ సేవలతో కనెక్టివిటీ ఎంపికలు విస్తరించడంతో పాటు నెట్‌వర్క్ స్థిరత్వం, వ్యాపార కార్యకలాపాల నిరంతర కొనసాగింపు మరింత మెరుగుపడతాయని తెలిపారు. సాంకేతికత, ఆవిష్కరణలు, పెట్టుబడులకు అనుకూలమైన నియంత్రణ వాతావరణాన్ని కొనసాగించడం ద్వారా యూఏఈని ప్రాంతీయ, ప్రపంచ టెలికమ్యూనికేషన్ మరియు డిజిటల్ ఎకానమీ కేంద్రంగా మరింత బలోపేతం చేయడమే లక్ష్యమని పేర్కొన్నారు.

ఈ లైసెన్స్ ద్వారా UAE Digital Agenda, “We the UAE 2031” లక్ష్యాలకు అనుగుణంగా దేశ డిజిటల్ మౌలిక సదుపాయాలు మరింత విస్తరించనున్నాయి.