దుబాయ్: Dh964 షాపింగ్ ఓ సేల్స్‌మ్యాన్ జీవితాన్ని ఒక్కసారిగా మార్చేసింది. దుబాయ్‌లో పనిచేస్తున్న మొహమ్మద్ సల్మాన్ రెండు బెడ్‌రూమ్‌ల అపార్ట్‌మెంట్‌ను బహుమతిగా గెలుచుకున్నారు. దుబాయ్ ఫెస్టివల్ సిటీలో జరిగిన లైవ్ డ్రాలో తాను విజేతగా నిలిచాడు. సల్మాన్ దుబాయ్‌లోని ఓ ఆహార పదార్థాల దుకాణంలో సేల్స్‌మ్యాన్‌గా పనిచేస్తున్నారు. ఆయన మే 27న యూనియన్ కోఆపరేటివ్ సూపర్‌మార్కెట్‌లో చేసిన Dh964 బిల్లు ద్వారా విజేతగా నిలిచాడు.

ఈ డ్రా దుబాయ్ నిర్వహించిన ‘Win Your Home in Dubai’ షాపింగ్ క్యాంపెయిన్‌లో భాగంగా జరిగింది. ఈ ప్రచారంలో పాల్గొన్న దుకాణాల్లో కనీసం Dh500 విలువైన కొనుగోళ్లు చేసిన వారికి తమ కొనుగోలును రిజిస్టర్ చేసుకుని లక్కీ డ్రాలో పాల్గొనే అవకాశం కల్పించారు. మే 22న ప్రారంభమైన ఈ క్యాంపెయిన్‌లో మొత్తం 12 ఇళ్లు బహుమతులుగా అందించారు. ఇందులో 11 స్టూడియో అపార్ట్‌మెంట్లు ఉండగా, ప్రధాన బహుమతిగా రెండు బెడ్‌రూమ్‌ల అపార్ట్‌మెంట్‌ను అందించారు.