కువైట్: ఫర్వానియా ప్రాంతంలో ఖాళీ స్థలంలో పార్క్ చేసి ఉన్న పలు వాహనాల్లో మంగళవారం తెల్లవారుజామున అగ్నిప్రమాదం చోటుచేసుకుంది. సమాచారం అందుకున్న వెంటనే అగ్నిమాపక సిబ్బంది ఘటనాస్థలికి చేరుకుని మంటలను అదుపులోకి తీసుకువచ్చారు.

ఈ ఘటనపై సమాచారం అందిన వెంటనే ఫర్వానియా ఫైర్ స్టేషన్‌కు చెందిన అగ్నిమాపక సిబ్బందిని ఘటనాస్థలికి పంపినట్లు జనరల్ ఫైర్ ఫోర్స్ తెలిపింది. పార్కింగ్ కోసం ఉపయోగిస్తున్న మట్టి స్థలంలో నిలిపి ఉంచిన పలు వాహనాలకు మంటలు వ్యాపించాయని అధికారులు తెలిపారు. అగ్నిమాపక సిబ్బంది వేగంగా స్పందించి మంటలను పూర్తిగా ఆర్పివేశారు.

ఈ ఘటనలో ఎవరికి ఎలాంటి గాయాలు కాలేదని అధికారులు వెల్లడించారు. అగ్నిప్రమాదానికి గల కారణాలు, మంటలు ఎలా చెలరేగాయనే విషయంపై సంబంధిత అధికారులు దర్యాప్తు చేస్తున్నట్టు జనరల్ ఫైర్ ఫోర్స్ తెలిపింది.