మస్కట్: ఒమన్‌లో వాహనదారుల అభిరుచుల్లో మార్పు కనిపిస్తోంది. సంప్రదాయంగా ఎక్కువగా కనిపించే తెలుపు, సిల్వర్, నలుపు రంగుల వాహనాలకు భిన్నంగా ఇప్పుడు ఆరెంజ్, పర్పుల్ రంగుల వాహనాలకు ఆదరణ పెరుగుతోంది. ఈ రెండు రంగుల వాహనాల నమోదులో అత్యధిక వార్షిక వృద్ధి నమోదైనట్లు తాజా వాహన రిజిస్ట్రేషన్ గణాంకాలు వెల్లడించాయి.

ఒమన్ నేషనల్ సెంటర్ ఫర్ స్టాటిస్టిక్స్ అండ్ ఇన్ఫర్మేషన్ (NCSI) గణాంకాల ప్రకారం.. ఆరెంజ్ రంగు వాహనాల సంఖ్య 23.4 శాతం పెరిగింది. 2025 జూలైలో 17,694గా ఉన్న ఆరెంజ్ వాహనాల సంఖ్య 2026 జూలై నాటికి 19,357కు చేరింది. అదేవిధంగా, పర్పుల్ రంగు వాహనాల సంఖ్య 19.5 శాతం పెరిగి, 235 నుంచి 263కు చేరింది.
ఇక డార్క్ బ్లూ రంగు వాహనాలు మూడో అత్యధిక వృద్ధిని నమోదు చేశాయి. వీటి సంఖ్య 14.2 శాతం పెరిగి 2,060కు చేరింది. గ్రే రంగు వాహనాల సంఖ్య కూడా సుమారు 12 శాతం పెరిగి 2,04,952కు చేరింది.

ప్రత్యేక రంగుల వైపు యువత ఆసక్తి

ప్రకాశవంతమైన, ప్రత్యేకమైన రంగులను ఎంచుకోవడానికి వాహనదారులు ఇప్పుడు మరింత ఆసక్తి చూపుతున్నారని కొందరు వాహనదారులు అభిప్రాయపడుతున్నారు. సంప్రదాయ తెలుపు, సిల్వర్, నలుపు రంగులతో పోలిస్తే ఆరెంజ్ రంగు వాహనానికి మరింత ఉత్సాహభరితమైన, ప్రత్యేకమైన రూపాన్ని ఇస్తుందని భారతీయ ప్రవాసి కే. రవి పేర్కొన్నారు. వాహనం కొనుగోలు సమయంలో రంగు కూడా వ్యక్తిగత అభిరుచిని ప్రతిబింబించే అంశంగా మారుతోందన్నారు. ముఖ్యంగా యువ కొనుగోలుదారులు తమ వ్యక్తిత్వానికి సరిపోయే రంగులపై ఆసక్తి చూపుతున్నారని మరో వాహనదారు తెలిపారు. 

పర్పుల్, ఆరెంజ్ వంటి రంగులు వాహనానికి ప్రత్యేక ఆకర్షణను ఇస్తాయని పేర్కొన్నారు.
అయితే, కొత్త రంగుల వాహనాల నమోదులో వేగంగా వృద్ధి కనిపిస్తున్నప్పటికీ, ఒమన్ రోడ్లపై తెలుపు రంగు వాహనాలదే స్పష్టమైన ఆధిపత్యం కొనసాగుతోంది. 2026 జూలై చివరి నాటికి ఒమన్‌లో 802,190 తెలుపు రంగు వాహనాలు నమోదై ఉన్నాయి. దేశంలోని మొత్తం 1,904,534 నమోదిత వాహనాల్లో ఇవి 42.1 శాతం వాటాను కలిగి ఉన్నాయి.

తెలుపు రంగు వాహనాల సంఖ్య కూడా ఏడాది వ్యవధిలో 4.9 శాతం పెరిగింది. 2025 జూలైలో 781,975గా ఉన్న సంఖ్య 2026 జూలై నాటికి 802,190కు చేరింది. రంగుల వారీగా చూస్తే సిల్వర్ రంగు రెండో స్థానంలో ఉంది. మొత్తం 243,782 సిల్వర్ రంగు వాహనాలు నమోదై ఉండగా, వాటా 12.8 శాతంగా ఉంది. అనంతరం గ్రే రంగు వాహనాలు 204,952తో 10.8 శాతం వాటాను కలిగి ఉన్నాయి.

అలాగే బ్లాక్ రంగు వాహనాలు 104,269, బ్లూ రంగు వాహనాలు 104,880గా నమోదయ్యాయి. ఈ రెండు రంగులు సుమారు 5.5 శాతం చొప్పున వాటాను కలిగి ఉన్నాయి. పెర్ల్ రంగు వాహనాలు 87,724 (4.6 శాతం), రెడ్ రంగు వాహనాలు 76,804 (4 శాతం), గోల్డ్ రంగు వాహనాలు 67,773 (3.6 శాతం)గా నమోదయ్యాయి. మొత్తంగా ఒమన్‌లో నమోదైన వాహనాల సంఖ్య ఏడాది వ్యవధిలో 5.4 శాతం పెరిగింది. 2025 జూలైలో 1,851,469గా ఉన్న మొత్తం నమోదిత వాహనాల సంఖ్య 2026 జూలై నాటికి 1,904,534కు చేరింది.