కువైట్ : ప్రధాన ఆస్ఫాల్ట్ నిర్వహణ పనుల కోసం జహ్రా వైపు వెళ్లే ఆరో రింగ్ రోడ్డుపై రెండు మార్గాలను తాత్కాలికంగా మూసివేయనున్నట్లు ప్రజా పనుల మంత్రిత్వ శాఖ ప్రకటించింది. ఈ పనులు జనరల్ ట్రాఫిక్ డిపార్ట్‌మెంట్ సమన్వయంతో చేపట్టనున్నట్లు తెలిపింది.

జహ్రా దిశగా వెళ్లే ఆరో రింగ్ రోడ్‌లోని స్లో లేన్‌ను, అల్-షుహదా ప్రాంతానికి ఎదురుగా ఉన్న ప్రాంతం నుంచి 360 మాల్ వరకు నిర్వహణ పనుల సమయంలో మూసివేయనున్నారు. అదేవిధంగా, అల్-షుహదా ప్రాంతం నుంచి జహ్రా దిశగా ఆరో రింగ్ రోడ్డుపైకి వెళ్లే వాహనదారులు ఉపయోగించే బ్రిడ్జి ఎగ్జిట్‌ను కూడా తాత్కాలికంగా మూసివేస్తారు.

ప్రత్యామ్నాయ మార్గం ఇదే..

మూసివేత సమయంలో వాహనదారులు సర్వీస్ రోడ్డును ప్రత్యామ్నాయ మార్గంగా ఉపయోగించాలని అధికారులు సూచించారు. వాహనదారులు 360 మాల్ వద్ద ఎగ్జిట్ తీసుకుని, అనంతరం మళ్లీ ఆరో రింగ్ రోడ్డులో చేరవచ్చని తెలిపారు.
ఈ తాత్కాలిక మూసివేతలు సెప్టెంబర్ 4 అర్ధరాత్రి 12 గంటల నుంచి సెప్టెంబర్ 6 ఉదయం 5 గంటల వరకు అమల్లో ఉంటాయి. నిర్వహణ పనులు సుమారు మూడు రోజుల పాటు కొనసాగనున్నాయి.

నిర్వహణ పనుల సమయంలో వాహనదారులు జాగ్రత్తగా ప్రయాణించాలని, ట్రాఫిక్ మళ్లింపు సూచనలను పాటించాలని, వీలైనంత వరకు ప్రత్యామ్నాయ మార్గాలను ఉపయోగించాలని అధికారులు విజ్ఞప్తి చేశారు.