మస్కట్: ఒమన్‌లోని పోర్ట్ ఆఫ్ దుక్మ్‌కు ప్రపంచంలోని అతిపెద్ద రోల్-ఆన్/రోల్-ఆఫ్ (Ro-Ro) నౌకల్లో ఒకటి చేరుకుంది. చైనాకు చెందిన ప్రముఖ ఎలక్ట్రిక్ వాహన తయారీ సంస్థ BYDకు చెందిన ఈ నౌక తొలిసారిగా ఒమన్‌కు చేరుకున్నది. చైనా నుంచి బయలుదేరిన ఈ నౌకలో మొత్తం 9,200 వాహనాలను తరలించే సామర్థ్యం ఉంది. దుక్మ్ పోర్టుకు చేరుకునే సమయంలో ఇందులో GCC మార్కెట్ల కోసం 1,219 వాహనాలు ఉన్నాయి. మొత్తం సరుకును దుక్మ్ పోర్టులోనే అన్‌లోడ్ చేయనున్నారు. వాటిలో 200కు పైగా వాహనాలు ఒమన్ మార్కెట్‌కు కేటాయించగా, మిగిలిన వాహనాలను కువైట్, ఖతార్ సహా పలు గల్ఫ్ దేశాలకు తరలించనున్నారు.

పెద్ద సామర్థ్యం కలిగిన Ro-Ro నౌకలను స్వీకరించేందుకు దుక్మ్ పోర్ట్ సిద్ధంగా ఉందని ఈ రాక నిరూపించిందని అధికారులు తెలిపారు. పోర్టుకు ఏడాదికి సుమారు 3 లక్షల వాహనాలను నిర్వహించే సామర్థ్యం ఉంది. పోర్టులో 2.2 కిలోమీటర్ల వాణిజ్య బెర్త్ ఉండగా, బెర్త్ వద్ద నీటి లోతు 18 మీటర్ల వరకు ఉంటుంది. దీంతో భారీ వాణిజ్య నౌకలను స్వీకరించడంతో పాటు వివిధ రకాల సరుకులను నిర్వహించేందుకు అవకాశం ఉంది. పోర్ట్ ఆఫ్ దుక్మ్ సీఈఓ రెగ్గీ వెర్మ్యూలెన్ మాట్లాడుతూ.. BYDకు చెందిన తొలి నౌక దుక్మ్ పోర్టుకు చేరుకోవడం వాహనాల నిర్వహణ కార్యకలాపాల అభివృద్ధిలో కీలక మైలురాయిగా పేర్కొన్నారు.

కీలక మార్గం

అరేబియా సముద్ర తీరంలో, హోర్ముజ్ జలసంధికి వెలుపల దుక్మ్ పోర్ట్ ఉండటం దాని వ్యూహాత్మక ప్రాధాన్యతను పెంచుతోంది. ఆసియా మార్కెట్లను ఒమన్‌తో పాటు GCC దేశాలతో అనుసంధానించడంలో పోర్ట్ కీలక పాత్ర పోషిస్తోందని అధికారులు తెలిపారు. భారత ఉపఖండం, ఆసియా, ఆఫ్రికా, GCC మార్కెట్లకు అంతర్జాతీయ వాణిజ్య మార్గాల ద్వారా వేగవంతమైన కనెక్టివిటీ అందించేందుకు దుక్మ్ పోర్ట్‌కు అవకాశం ఉందన్నారు.
దుక్మ్ పోర్ట్‌లో వాహనాలను అన్‌లోడ్ చేసి, వాటిని వివిధ గల్ఫ్ మార్కెట్లకు రోడ్డు మార్గం ద్వారా తరలించడం ప్రాంతీయ సరఫరా వ్యవస్థను మరింత బలోపేతం చేస్తుందని అధికారులు తెలిపారు. లాజిస్టిక్స్ కనెక్టివిటీని పెంచడం, జాతీయ ఆర్థిక వ్యవస్థను విభిన్నీకరించడం, ఒమన్‌ను ప్రాంతీయ వాణిజ్య-లాజిస్టిక్స్ హబ్‌గా అభివృద్ధి చేయడం వంటివి ఒమన్ విజన్ 2040 లక్ష్యాలకు  అనుగుణంగా ఉందని పేర్కొన్నారు.