కెన్యాలో తమ కార్యకలాపాల వల్ల దేశానికి ఎలాంటి ప్రయోజనం చేకూరలేదని పేర్కొంటూ, అక్కడి కార్యకలాపాలను నిలిపివేయాలని భారతీయ సంస్థ ‘టాటా కెమికల్స్’ను ఆదేశించినట్లు కెన్యా అధ్యక్షుడు విలియం రుటో గురువారం తెలిపారు. టాటా కెమికల్స్ నిర్వహించే కార్యకలాపాలను చేపట్టేందుకు ప్రభుత్వం రెండు కొత్త కంపెనీలను తీసుకురానున్నట్లు ఆయన చెప్పారు. కాగా, మగాడి సోడా ఫ్యాక్టరీ వద్ద తమ కార్యకలాపాలను నిలిపివేయాలని మరియు సోడా యాష్ ఎగుమతులను ఆపివేయాలని కెన్యా ప్రభుత్వం తమ ‘టాటా కెమికల్ లిమిటెడ్’ యూనిట్‌ను ఆదేశించిందని టాటా సంస్థ గత జూలై చివరలో వెల్లడించింది.

నిర్మాణాత్మక చర్చలకు కట్టుబడి వున్నాం

కెన్యా ప్రభుత్వ అధికారాన్ని గౌరవిస్తున్నామని, పెండింగ్‌లో ఉన్న అంశాలను పరిష్కరించుకునేందుకు తగిన చట్టపరమైన మరియు నియంత్రణ మార్గాల ద్వారా నిర్మాణాత్మక చర్చలకు కట్టుబడి ఉన్నామని టాటా కెమికల్స్ గురువారం ఒక ప్రకటనలో తెలిపింది. సంబంధిత నియంత్రణ నిబంధనలను పాటించిన వివరాలతో సహా, ఆ మంత్రిత్వ శాఖ లేవనెత్తిన అంశాలపై తమ విభాగం “సమగ్ర” సమాధానాన్ని సమర్పించిందని కూడా కంపెనీ పేర్కొంది.

100 ఏళ్ల పాటు ఆ కాంట్రాక్ట్ ఉంది

దక్షిణ కెన్యాలోని కాజియాడో కౌంటీలో ఉన్న ‘మగాడి’ అనే పట్టణాన్ని రుటో ఆ రోజు ముందుగా సందర్శించారు. “ఆ టాటా సంస్థకు… 100 ఏళ్ల పాటు ఆ కాంట్రాక్ట్ ఉంది. వారు కాజియాడోలో ఏమీ నిర్మించలేదు, అక్కడ ఎలాంటి ఫ్యాక్టరీని కూడా ఏర్పాటు చేయలేదు,” అని రుటో అన్నారు. “మేము ఒక కొత్త సంస్థను తీసుకువస్తామని చెప్పాము… వారు ఇక్కడ కాజియాడోలో ఒక పెద్ద గ్లాస్ (అద్దాల) తయారీ సంస్థను ఏర్పాటు చేయాలి. అలాగే రసాయనాలను తయారు చేసే మరో సంస్థను కూడా ఇక్కడ నెలకొల్పాలి. మనం ఇతరులకు బానిసలమా?” అని రుటో ప్రశ్నించారు. తమ ఉద్యోగులు, మగాడి ప్రాంత ప్రజలు, కెన్యాలోని తమ వాటాదారులు మరియు కెన్యా యొక్క నిరంతర ఆర్థికాభివృద్ధి పట్ల శ్రద్ధ వహించడమే తమ “ప్రాధాన్యతగా కొనసాగుతుందని” టాటా కెమికల్స్ పేర్కొంది.