అమరావతి: ఆంధ్రప్రదేశ్‌లో త్వరలో జరగబోయే స్థానిక సంస్థల ఎన్నికలను అత్యంత ప్రతిష్టాత్మకంగా తీసుకోవాలని వైయస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్మోహన్ రెడ్డి పార్టీ శ్రేణులకు పిలుపునిచ్చారు. తాడేపల్లిలోని కేంద్ర కార్యలయంలో రీజనల్ కో-ఆర్డినేటర్లతో నిర్వహించిన ఉన్నత స్థాయి భేటీలో ఆయన ఈ మేరకు దిశానిర్దేశం చేశారు. క్షేత్రస్థాయి నుంచి పార్టీని బలోపేతం చేసే దిశగా భవిష్యత్ కార్యాచరణను ఈ సమావేశంలో విస్తృతంగా చర్చించారు.

ప్రజాదరణే ప్రాతిపదికగా అభ్యర్థుల ఎంపిక
ఎన్నికల్లో పోటీ చేసేందుకు వీలైనంత త్వరగా మెరుగైన ప్రజాబలం ఉన్న నేతలను గుర్తించాలని జగన్ స్పష్టం చేశారు. అభ్యర్థుల ఎంపిక ఏకపక్షంగా ఉండకూడదని, పార్టీ శ్రేణుల అభిప్రాయాలను పరిగణనలోకి తీసుకుని, సమగ్ర చర్చల తర్వాతే తుది జాబితాను ఖరారు చేయాలని ఆదేశించారు. స్థానిక సంస్థల్లో గెలిచే నేతలే భవిష్యత్తులో జరిగే సార్వత్రిక ఎన్నికలకు బలమైన పునాదిగా మారుతారని ఆయన అభిప్రాయపడ్డారు.

ప్రభుత్వ వైఫల్యాలను ఎండగట్టాలని ఆదేశం
రాష్ట్రంలో కూటమి ప్రభుత్వం అధికారంలోకి వచ్చి రెండేళ్ల పైబడినా అన్ని రంగాలలోనూ ఘోరంగా విఫలమైందని జగన్ విమర్శించారు. ప్రస్తుత ప్రభుత్వ పాలనలోని లోపాలు, ప్రజలు ఎదుర్కొంటున్న ఇబ్బందులను ప్రతి ఇంటికీ వెళ్లి వివరించాలని కేడర్‌కు సూచించారు. తమ హయాంలో అందించిన సంక్షేమ పథకాలను ప్రజలకు గుర్తుచేస్తూ, ప్రస్తుత పాలకుల వైఫల్యాలను బలంగా ప్రజల్లోకి తీసుకువెళ్లాలని కోరారు.

అధికార దుర్వినియోగం పై అప్రమత్తత
ఎన్నికల్లో విజయం సాధించేందుకు అధికార పక్షం పోలీసు యంత్రాంగాన్ని అడ్డుపెట్టుకుని వివిధ మార్గాల్లో ప్రయత్నించే అవకాశం ఉందని జగన్ తీవ్ర ఆందోళన వ్యక్తం చేశారు. ఎలాంటి రాజకీయ కుట్రలనైనా ధీటుగా ఎదుర్కొనేలా పార్టీ శ్రేణులు సన్నద్ధం కావాలని కోరారు. ఏవైనా పరిస్థితులు ఎదురైనా వాటిని సమర్థవంతంగా తిప్పికొట్టేందుకు రీజనల్ కో-ఆర్డినేటర్లు ముందస్తు ప్రత్యామ్నాయ వ్యూహాలను సిద్ధం చేసుకోవాలని ఆయన హితవు పలికారు.