దోహా: ఖతార్‌లో సముద్ర రవాణా రంగం పూర్తిస్థాయి డిజిటలైజేషన్ దిశగా వేగంగా అడుగులు వేస్తోంది. పెద్ద నౌకలకు సంబంధించిన దాదాపు 95 శాతం లావాదేవీలు ప్రస్తుతం ఆన్‌లైన్‌లోనే అందుబాటులోకి వచ్చినట్లు రవాణా మంత్రిత్వ శాఖ వెల్లడించింది. దీంతో నౌక యజమానులు, సముద్ర రవాణా రంగానికి చెందిన వినియోగదారులు ప్రభుత్వ కార్యాలయాలకు వెళ్లాల్సిన అవసరం గణనీయంగా తగ్గనుంది. రవాణా మంత్రిత్వ శాఖ తాజాగా పెద్ద నౌకలకు సంబంధించిన 11 కొత్త ఎలక్ట్రానిక్ సేవలను అందుబాటులోకి తీసుకొచ్చింది. దీంతో మారిటైమ్ రంగంలో అందుబాటులో ఉన్న డిజిటల్ సేవల సంఖ్య 21కి చేరిందని రవాణా మంత్రిత్వ శాఖలో మారిటైమ్ ట్రాన్స్‌పోర్ట్ అఫైర్స్ అసిస్టెంట్ అండర్‌సెక్రటరీ కార్యాలయ డైరెక్టర్ ఇబ్రహీం బిన్ హసన్ అల్ కువారీ తెలిపారు. మాన్యువల్ విధానాలకు బదులుగా ఎలక్ట్రానిక్ సేవలను అందించడమే లక్ష్యంగా డిజిటల్ మార్పును కొనసాగిస్తున్నామని తెలిపారు.

ఇంటి నుంచే దరఖాస్తు.. చెల్లింపులు

మంత్రిత్వ శాఖ వెబ్‌సైట్ ద్వారా మొబైల్ ఫోన్‌తో కూడా చాలా సేవలను పొందవచ్చని అల్ కువారీ తెలిపారు. వినియోగదారులు ఇంటి నుంచి లేదా కార్యాలయం నుంచే దరఖాస్తు చేసుకోవడం, దాని స్టేటస్‌ను ట్రాక్ చేయడం, చెల్లింపులు పూర్తి చేయడం వంటి ప్రక్రియలను నిర్వహించవచ్చు. చెల్లింపు పూర్తయిన తర్వాత ధ్రువపత్రాలను ఈమెయిల్ ద్వారా పొందే అవకాశం కూడా ఉంది. ఈ సర్టిఫికెట్లపై అధికారిక ముద్రతో పాటు QR కోడ్ ఉంటుంది. దీని ద్వారా ఆ ధ్రువపత్రం నిజమైనదేనా అనే విషయాన్ని సులభంగా ధృవీకరించవచ్చు. ముఖ్యంగా వెసెల్ డిలీషన్ సర్టిఫికెట్ వంటి పత్రాలను ఖతార్ వెలుపల ఉన్న అధికారులు కూడా QR కోడ్ ద్వారా ఖతార్ సంబంధిత అధికార సంస్థ జారీ చేసిందా లేదా అనేది నిర్ధారించుకోవచ్చు.

ఎక్కువగా ఉపయోగించే సేవలకు ప్రాధాన్యం

కొత్తగా డిజిటల్ చేసిన సేవలను వినియోగదారుల అవసరాలను పరిగణనలోకి తీసుకుని రూపొందించినట్లు అధికారులు తెలిపారు. గతంలో పెద్ద నౌకలకు సంబంధించి నెలకు 80 నుంచి 100 వరకు మాన్యువల్ దరఖాస్తులు వచ్చేవి. పత్రాలు లేదా సమాచారం అసంపూర్తిగా ఉంటే దరఖాస్తుదారులు పలుమార్లు ప్రభుత్వ కార్యాలయాలను సందర్శించాల్సి వచ్చేది.

ఇప్పుడు ఆన్‌లైన్‌లో అందుబాటులోకి వచ్చిన సేవల్లో:

* నౌక యాజమాన్య బదిలీ

* నౌక విక్రయ లావాదేవీలు

* మార్ట్గేజ్ సర్టిఫికెట్ల జారీ

* మార్ట్గేజ్ విడుదల

* వెసెల్ డిలీషన్ సర్టిఫికెట్

వంటి ముఖ్యమైన సేవలు ఉన్నాయి. వినియోగదారుల నుంచి ఎక్కువగా అభ్యర్థనలు వచ్చిన సేవల్లో వెసెల్ డిలీషన్ సర్టిఫికెట్ కూడా ఉండటంతో దానిని కొత్త డిజిటల్ సేవల ప్యాకేజీలో చేర్చినట్లు అల్ కువారీ తెలిపారు.

చిన్న నౌకలకు ప్రత్యేక ప్లాట్‌ఫామ్

కొత్తగా డిజిటలైజ్ చేసిన సేవలు పెద్ద నౌకలకు సంబంధించినవని అధికారులు స్పష్టం చేశారు. చిన్న సముద్ర నౌకలు, బోట్లకు సంబంధించిన సేవలను ప్రత్యేక ప్లాట్‌ఫామ్ ద్వారా ఇప్పటికే ఎలక్ట్రానిక్ విధానంలో అందిస్తున్నారు. సేవలను ఉపయోగించడంలో ఇబ్బందులు ఎదురయ్యే వారికి మంత్రిత్వ శాఖ వెబ్‌సైట్, ఈమెయిల్ ద్వారా సహాయం పొందే అవకాశం కూడా ఉంది. దరఖాస్తు విధానం, అవసరమైన పత్రాలపై అధికారులు మార్గదర్శకత్వం అందిస్తారు.

ఖతార్ ప్రభుత్వ విస్తృత డిజిటల్ సేవల వ్యవస్థతో మారిటైమ్ సేవలను అనుసంధానిస్తున్నట్లు అల్ కువారీ తెలిపారు. వినియోగదారులు నేషనల్ ఆథెంటికేషన్ సిస్టమ్ (తవ్తీక్) ద్వారా మంత్రిత్వ శాఖ ఎలక్ట్రానిక్ సేవలను యాక్సెస్ చేయవచ్చు. అలాగే ఎలక్ట్రానిక్ చెల్లింపులు కూడా ప్రభుత్వ విస్తృత కలెక్షన్ వ్యవస్థతో అనుసంధానమై ఉన్నాయి.

 మరిన్ని సేవలు డిజిటల్ చేసే అవకాశం

డిజిటల్ మార్పు నిరంతరం కొనసాగుతుందని అధికారులు తెలిపారు. సాంకేతిక అభివృద్ధి, వినియోగదారుల అవసరాలకు అనుగుణంగా సేవలను ఎప్పటికప్పుడు మెరుగుపరచాల్సిన అవసరం ఉందన్నారు. లావాదేవీ పూర్తయిన తర్వాత వినియోగదారులు తమ అభిప్రాయాలను తెలియజేసే అవకాశం కూడా ప్లాట్‌ఫామ్‌లో ఉంది. ఈ ఫీడ్‌బ్యాక్ ఆధారంగా లోపాలను గుర్తించి సేవలను మెరుగుపరుస్తామని తెలిపారు. భవిష్యత్తులో మరిన్ని సర్టిఫికెట్లు లేదా లావాదేవీలను డిజిటల్ చేయాల్సిన అవసరం ఉంటే వాటిపై వినియోగదారులు సూచనలు ఇవ్వాలని మంత్రిత్వ శాఖ కోరింది. అదే సమయంలో డిజిటల్ సేవలు విస్తరిస్తున్న నేపథ్యంలో డేటా భద్రత, గోప్యత, సమాచార రక్షణకు ప్రాధాన్యం ఇస్తున్నట్లు అధికారులు స్పష్టం చేశారు.

కొత్త డిజిటల్ సేవలతో నౌక యజమానులకు పేపర్‌వర్క్, ప్రభుత్వ కార్యాలయాల చుట్టూ తిరగడం, ప్రాసెసింగ్ సమయం వంటి భారాలు తగ్గడంతో పాటు.. ఎక్కడి నుంచైనా దరఖాస్తులను పూర్తి చేసి వాటి పురోగతిని తెలుసుకునే అవకాశం మరింత సులభతరం కానుంది.