రియాద్‌: హౌతీ మిలీషియా దాడులను ఎదుర్కొంటున్న సౌదీ అరేబియాకు ఈజిప్ట్‌, జోర్డాన్‌ దేశాలు పూర్తి సంఘీభావం ప్రకటించాయి. ఈ మేరకు సౌదీ విదేశాంగ మంత్రి ప్రిన్స్‌ ఫైసల్‌ బిన్‌ ఫర్హాన్‌తో ఈజిప్ట్‌ విదేశాంగ మంత్రి డాక్టర్‌ బదర్‌ అబ్దెలాటీ, జోర్డాన్‌ ఉప ప్రధాని, విదేశాంగ మంత్రి ఐమన్‌ సఫాది వేర్వేరుగా ఫోన్‌లో మాట్లాడారు. ఈజిప్ట్‌ విదేశాంగ మంత్రితో జరిగిన సంభాషణలో సౌదీ–ఈజిప్ట్‌ మధ్య సోదరభావ, వ్యూహాత్మక సంబంధాలు, వివిధ రంగాల్లో ద్వైపాక్షిక సహకారాన్ని మరింత బలోపేతం చేసే మార్గాలపై చర్చించారు.

సౌదీ అరేబియాను లక్ష్యంగా చేసుకుని జరుగుతున్న అన్ని దాడులను ఈజిప్ట్‌ ఖండిస్తోందని అబ్దెలాటీ తెలిపారు. సౌదీ భద్రత, స్థిరత్వానికి ఈజిప్ట్‌ పూర్తి మద్దతు ఉంటుందని స్పష్టం చేశారు. ప్రాంతీయ పరిణామాలపైనా ఇరువురు మంత్రులు చర్చించారు. ముఖ్యంగా ఎర్ర సముద్రం, బాబ్‌ అల్‌-మందెబ్‌ జలసంధి సహా సముద్ర మార్గాల భద్రత, నౌకాయాన స్వేచ్ఛను పరిరక్షించాల్సిన అవసరాన్ని ఉందని తెలిపారు.

అలాగే సూడాన్‌ ఐక్యత, సార్వభౌమత్వానికి, జాతీయ సంస్థల పరిరక్షణకు తమ దేశాల మద్దతు కొనసాగుతుందని ఇరువురు మంత్రులు పునరుద్ఘాటించారు. సూడాన్‌ భద్రత, స్థిరత్వాన్ని కాపాడుతూ.. ఆ దేశ ప్రజల ఆకాంక్షలను నెరవేర్చే విధంగా చర్యలు ఉండాలని పేర్కొన్నారు. జోర్డాన్‌ విదేశాంగ మంత్రి ఐమన్‌ సఫాదితో జరిగిన ఫోన్‌ సంభాషణలో సౌదీ–జోర్డాన్‌ మధ్య ఉన్న సుదీర్ఘ సోదర సంబంధాలు, తాజా ప్రాంతీయ పరిణామాలపై ప్రిన్స్‌ ఫైసల్‌ చర్చించారు. ప్రాంతీయ భద్రత, స్థిరత్వం కోసం ఉమ్మడి ప్రయత్నాలను బలోపేతం చేసేందుకు ఇరు దేశాల మధ్య సమన్వయం, సంప్రదింపులు కొనసాగాల్సిన అవసరాన్ని వారు నొక్కిచెప్పారు.

సౌదీ అరేబియాపై హౌతీ మిలీషియా జరిపిన దాడులను జోర్డాన్‌ విదేశాంగ మంత్రి తీవ్రంగా ఖండించారు. **మక్కా, మదీనాలను లక్ష్యంగా చేసుకునే ప్రయత్నాలతో పాటు పౌర, ఆర్థిక సౌకర్యాలపై జరిగిన దాడులను** కూడా ఆయన ఖండించారు. సౌదీ అరేబియాకు జోర్డాన్‌ పూర్తి సంఘీభావం ప్రకటిస్తూ, ఆ దేశ భద్రత, స్థిరత్వం, ప్రాదేశిక సమగ్రతను కాపాడేందుకు సౌదీ తీసుకునే అన్ని చర్యలకు పూర్తి మద్దతు ఉంటుందని స్పష్టం చేశారు.