కువైట్: కువైట్‌లో సెకండ్‌హ్యాండ్ కార్ల మార్కెట్ వేగంగా విస్తరిస్తోంది. తక్కువ ధరలకు కార్లు కొనుగోలు చేయాలనే వినియోగదారుల ఆసక్తి, వాహనాల దిగుమతులు పెరగడం, డీలర్లు మరియు రెంటల్ కంపెనీల భాగస్వామ్యం అధికం కావడం, ఆన్‌లైన్ విక్రయ వేదికల విస్తరణ ఈ రంగం వృద్ధికి ప్రధాన కారణాలుగా నిలుస్తున్నాయి. ఈ మార్కెట్ విలువ 2031 నాటికి 3.94 బిలియన్ డాలర్లకు చేరుకోవచ్చని మార్కెట్ పరిశోధనా సంస్థ మోర్డర్ ఇంటెలిజెన్స్ అంచనా వేసింది.

2025లో 1.65 బిలియన్ డాలర్ల మార్కెట్

మోర్డర్ ఇంటెలిజెన్స్ అంచనాల ప్రకారం..  కువైట్‌లో యూజ్డ్ కార్ల మార్కెట్ విలువ 2025లో సుమారు 1.65 బిలియన్ డాలర్లుగా ఉంది. 2026లో ఇది 1.91 బిలియన్ డాలర్లకు చేరుకోవచ్చని, 2031 నాటికి 3.94 బిలియన్ డాలర్లకు పెరగవచ్చని అంచనా వేస్తున్నారు. 2026 నుంచి 2031 వరకు ఈ మార్కెట్ వార్షిక సగటు వృద్ధి రేటు (CAGR) 15.62 శాతంగా ఉండనుందని భావిస్తున్నారు.

దిగుమతుల్లోనూ పెరుగుదల

కువైట్ సెంట్రల్ స్టాటిస్టికల్ బ్యూరో గణాంకాల ప్రకారం..  దేశంలో ప్యాసింజర్ వాహనాల దిగుమతుల విలువ 2024లో KD 1.334 బిలియన్లుగా ఉండగా, 2025లో KD 1.546 బిలియన్లకు పెరిగింది. ఇది 15.9 శాతం వృద్ధికి సమానం. అంటే ఏడాది వ్యవధిలో దిగుమతుల విలువ KD 212.09 మిలియన్లు పెరిగింది.

3 నుంచి 5 ఏళ్ల కార్లకు డిమాండ్

కువైట్ యూజ్డ్ కార్ల మార్కెట్‌లో మూడు నుంచి ఐదేళ్ల వయసున్న కార్లకు అధిక ఆదరణ లభిస్తోంది. 2025లో ఈ విభాగం మార్కెట్‌లో 33.95 శాతం వాటాను కలిగి ఉంది. తక్కువ ధర, ఆధునిక ఫీచర్లు, కొత్త కార్లతో పోలిస్తే తరుగుదల ప్రభావం వంటి అంశాలు కొనుగోలుదారులను ఈ కార్ల వైపు ఆకర్షిస్తున్నాయి. బాడీ టైప్ ఆధారంగా సెడాన్లు 37.8 శాతం మార్కెట్ వాటాతో ముందున్నాయి. అయితే ఎస్‌యూవీ (SUV) వాహనాల విభాగం అత్యంత వేగంగా వృద్ధి చెందే అవకాశం ఉందని అంచనా. 2031 వరకు ఈ విభాగం వార్షిక వృద్ధి రేటు 17.1 శాతంగా ఉండవచ్చని నివేదిక పేర్కొంది.

కువైట్ సిటీలో అధిక లావాదేవీలు

కువైట్ సిటీ, అహ్మది, హవల్లి ప్రాంతాలు కలిసి యూజ్డ్ కార్ల లావాదేవీల్లో 70 శాతానికి పైగా వాటాను కలిగి ఉన్నాయి. ఈ ప్రాంతాల్లో కార్ల షోరూమ్‌లు, డీలర్లు, సంబంధిత సేవలు అధికంగా ఉండటమే ఇందుకు కారణం. షువైఖ్, ఫర్వానియా, జహ్రా ప్రాంతాలు కూడా సెకండ్‌హ్యాండ్ కార్ల వ్యాపారానికి కీలక కేంద్రాలుగా కొనసాగుతున్నాయి.

ఆన్‌లైన్‌లో ఆదరణ

2025లో సంప్రదాయ విక్రయ మార్గాల ద్వారా 60.55 శాతం కార్ల విక్రయాలు జరిగాయి. అయితే ఆన్‌లైన్ ప్లాట్‌ఫారమ్‌లు వేగంగా విస్తరిస్తున్నాయి. 2031 వరకు ఈ విభాగం వార్షిక వృద్ధి రేటు 18.25 శాతంగా ఉండవచ్చని అంచనా వేస్తున్నారు. డిజిటల్ వేదికల ద్వారా కొనుగోలుదారులు కార్ల ధరలు, సాంకేతిక వివరాలు, గత యాజమాన్య సమాచారం, వాహన చరిత్రను పోల్చి చూసిన తర్వాత కొనుగోలు నిర్ణయం తీసుకునే అవకాశం లభిస్తోంది.

డీలర్లకు పెరగనున్న అవకాశాలు

2025లో మార్కెట్ ఆదాయంలో నియంత్రణల పరిధిలో లేని విక్రేతల వాటా 71.55 శాతంగా ఉంది. అయితే భవిష్యత్తులో వాహన తనిఖీలు, వారంటీలు, నిర్వహణ రికార్డులు, ఫైనాన్సింగ్, విక్రయానంతర సేవలకు ప్రాధాన్యం పెరగడంతో నిబంధనలకు అనుగుణంగా పనిచేసే విక్రేతల విభాగం విస్తరించవచ్చని అంచనా వేస్తున్నారు.

పెట్రోల్ కార్లదే ఆధిపత్యం.. ఈవీలపై ఆసక్తి

2025లో కువైట్ యూజ్డ్ కార్ల మార్కెట్‌లో పెట్రోల్ వాహనాల వాటా 85.1 శాతంగా ఉంది. తక్కువ ఇంధన ధరలు, ఇప్పటికే అందుబాటులో ఉన్న మౌలిక సదుపాయాలు వీటి ఆధిపత్యానికి కారణాలుగా నిలుస్తున్నాయి. ప్రస్తుతం సెకండ్‌హ్యాండ్ ఎలక్ట్రిక్ వాహనాల (EV) వాటా తక్కువగానే ఉన్నప్పటికీ, 2026 నుంచి 2031 మధ్య ఈ విభాగం వార్షికంగా 20.95 శాతం వృద్ధి చెందవచ్చని అంచనా వేస్తున్నారు. అన్ని ఇంధన రకాలతో పోలిస్తే ఎలక్ట్రిక్ వాహనాల విభాగమే వేగంగా వృద్ధి చెందే అవకాశాలున్నాయని నివేదిక సూచిస్తోంది.

 రెంటల్ కంపెనీల కార్లతో మరిన్ని ఎంపికలు

కారు అద్దె సంస్థలు, కార్పొరేట్ కంపెనీల వాహనాలు సెకండ్‌హ్యాండ్ మార్కెట్‌లోకి రావడం వల్ల వినియోగదారులకు కొత్త కార్లకు దగ్గరగా ఉండే, తక్కువ కాలం ఉపయోగించిన వాహనాలు అందుబాటులోకి వస్తున్నాయి. మార్కెట్‌లో పోటీ పెరుగుతున్న నేపథ్యంలో విక్రేతలు కేవలం తక్కువ ధరలకే కాకుండా వాహన నాణ్యత, పారదర్శకత, నిర్వహణ వివరాలు, విక్రయానంతర సేవలపై దృష్టి సారిస్తున్నారు. దీంతో కొనుగోలుదారులు కారును కొనుగోలు చేసే ధరతో పాటు దీర్ఘకాలంలో దాని ద్వారా లభించే విలువకు కూడా ప్రాధాన్యం ఇస్తున్నారని మార్కెట్ పరిణామాలు సూచిస్తున్నాయని నిపుణులు చెబుతున్నారు.