మస్కట్: ఒమన్ రాజధాని మస్కట్ గవర్నరేట్ పరిధిలోని పెట్రోల్ బంకుల్లో ఈ ఏడాది మొదటి ఆరు నెలల్లో 46 ఉల్లంఘనలు గుర్తించినట్లు వాణిజ్య, పరిశ్రమలు, పెట్టుబడుల ప్రోత్సాహక మంత్రిత్వ శాఖ వెల్లడించింది. ఈ కాలంలో ఇంధన విక్రయ కేంద్రాలపై విస్తృత తనిఖీలు నిర్వహించినట్లు తెలిపింది. వినియోగదారుల ప్రయోజనాలను పరిరక్షించడం, నిబంధనల అమలును పర్యవేక్షించడం, వాణిజ్య కార్యకలాపాల నాణ్యతను మెరుగుపరచడం లక్ష్యంగా ఈ తనిఖీలు చేపట్టినట్లు మంత్రిత్వ శాఖ పేర్కొంది.

మంత్రిత్వ శాఖ వివరాల ప్రకారం.. ఇంధన విక్రయ కేంద్రాలపై మొత్తం 998 క్షేత్రస్థాయి తనిఖీలు నిర్వహించి, 350 ఇంధన పంపిణీ నాజిళ్లను పరిశీలించారు. ఈ తనిఖీల్లో 46 ఉల్లంఘనలు బయటపడ్డాయి. అలాగే మస్కట్ గవర్నరేట్‌లోని 90 పెట్రోల్ బంకులను లక్ష్యంగా చేసుకుని తనిఖీలు నిర్వహించినట్లు నివేదికలో పేర్కొన్నారు.

వాణిజ్య రంగంలో భాగంగా 600 వ్యాపార సంస్థలను తనిఖీ చేశారు. 14 ప్రదర్శనలను పర్యవేక్షించడంతో పాటు, 139 ప్రచార డ్రాల నిర్వహణను పరిశీలించారు. మేధో సంపత్తి హక్కులకు సంబంధించిన అంశాల్లో 36 రాతపూర్వక హెచ్చరికలు జారీ చేశారు.  పారిశ్రామిక రంగంలో 65 సంస్థలను తనిఖీ చేసి, వాటి కార్యకలాపాలపై పర్యవేక్షణ చేపట్టారు. ఆరు నెలల వ్యవధిలో 72 క్షేత్రస్థాయిలో తనిఖీలు నిర్వహించారు.

ఉత్పత్తుల నాణ్యత, ప్రమాణాలకు అనుగుణంగా ఉన్నాయా అనే అంశంపై 13,671 నమూనాలను పరీక్షించారు. అలాగే 172 వాణిజ్య తూకపు యంత్రాలను తనిఖీ చేయగా, మొత్తం 168 ఉల్లంఘనలు గుర్తించినట్లు మంత్రిత్వ శాఖ వెల్లడించింది.

మార్కెట్‌లో విక్రయించే వస్తువులు, అందించే సేవల నాణ్యతను మెరుగుపరచడం, వ్యాపార సంస్థలు నిబంధనలు పాటించేలా చూడడం, వినియోగదారుల హక్కులను కాపాడటం కోసం తనిఖీలను నిరంతరం కొనసాగిస్తామని అధికారులు తెలిపారు.