అబుదాబి: యూఏఈలోని అబుదాబిలో నలుగురు విద్యార్థులపై భౌతిక దాడికి పాల్పడిన ఓ ఉపాధ్యాయుడికి క్రిమినల్ కోర్టు రెండేళ్ల జైలు శిక్ష విధించింది. శిక్ష పూర్తయిన తర్వాత దేశం నుంచి బహిష్కరించాలని, కోర్టు ఖర్చులన్నింటినీ చెల్లించాలని ఆదేశించింది.

అబుదాబిలోని ఓ ప్రైవేట్ పాఠశాలలో తరగతి జరుగుతున్న సమయంలో ఉపాధ్యాయుడు నలుగురు విద్యార్థులపై దాడి చేశాడు. ఈ ఘటనలో విద్యార్థులకు గాయాలయ్యాయి. వారు తమ రోజువారీ పనులను స్వయంగా చేసుకోలేని పరిస్థితి గరిష్ఠంగా 20 రోజుల వరకు కొనసాగినట్లు కేసు వివరాలు వెల్లడించాయి.

విచారణ సమయంలో, కోర్టు ముందు కూడా ఉపాధ్యాయుడు తన నేరాన్ని అంగీకరించాడు. తరగతి సమయంలో విద్యార్థులు అల్లరి చేస్తూ పాఠాలకు అంతరాయం కలిగించకుండా ఉండేందుకు, వారిని క్రమశిక్షణలో పెట్టాలనే ఉద్దేశంతో కొట్టినట్లు చెప్పాడు. అయితే, తరగతి గదిలోని సీసీటీవీ ఫుటేజీ విద్యార్థులపై జరిగిన దాడి తీవ్రతను స్పష్టంగా చూపించిందని అధికారులు తెలిపారు. దాడికి ఎలాంటి సమర్థన లేదని పేర్కొన్నారు.

చట్టాల ఉల్లంఘనగా కోర్టు వ్యాఖ్య

పాఠశాలలో, పాఠాలు జరుగుతున్న సమయంలో ఈ దాడి చోటుచేసుకోవడం ప్రజా భద్రతకు, వ్యక్తిగత హక్కులకు విఘాతం కలిగించే చర్యగా కోర్టు పేర్కొంది. ఇలాంటి ఘటనలు పునరావృతం కాకుండా చట్టాలను కఠినంగా అమలు చేయాల్సిన అవసరం ఉందని స్పష్టం చేసింది. అబుదాబి జ్యుడీషియల్ డిపార్ట్‌మెంట్ ఈ వివరాలను వెల్లడించింది.

విద్యార్థులపై శారీరక దాడి నేరం

యూఏఈ సమాఖ్య చట్టాల ప్రకారం విద్యార్థులపై ఉపాధ్యాయులు శారీరక దాడికి పాల్పడటం నిషేధం. ఘటన తీవ్రతను బట్టి క్రిమినల్ కేసుతో పాటు క్రమశిక్షణ చర్యలు, ఉద్యోగం నుంచి తొలగింపు వంటి పరిణామాలు ఎదురుకావచ్చు. 2022లో జారీ చేసిన విద్యాసంస్థల్లో జాతీయ బాలల రక్షణ విధానం ప్రకారం.. పిల్లలకు శారీరక గాయాలు కలిగించడం లేదా అలాంటి హానిని నివారించడంలో విఫలమవడం కూడా శారీరక వేధింపుల పరిధిలోకి వస్తుంది.

యూఏఈ నేరాలు, శిక్షలకు సంబంధించిన చట్టం ప్రకారం.. గాయాలు లేదా అనారోగ్యానికి కారణమయ్యే దాడులకు జైలు శిక్ష, జరిమానా విధించే అవకాశం ఉంది. వర్తించే శిక్ష ఘటన పరిస్థితులు, గాయాల తీవ్రతపై ఆధారపడి ఉంటుంది.