విజయవాడ: తమిళనాడు ముఖ్యమంత్రి తిరు సి.జోసెఫ్ విజయ్‌తో ఆంధ్రప్రదేశ్‌లో జరిగిన సమావేశంలో పరస్పర ప్రయోజనాలకు సంబంధించిన పలు కీలక అంశాలపై చర్చలు జరిగాయి. ముఖ్యంగా చెన్నై నగర తాగునీటి అవసరాల కోసం అమలు చేస్తున్న తెలుగు గంగ ప్రాజెక్టు, ప్రతిష్ఠాత్మక గోదావరి–కావేరి నదుల అనుసంధాన ప్రాజెక్టుపై ఇరు రాష్ట్రాల మధ్య చర్చలు జరిగినట్లు వెల్లడించారు.

ఈ ఏడాది ఇప్పటివరకు చెన్నై తాగునీటి అవసరాల కోసం ఆంధ్రప్రదేశ్ ప్రభుత్వం 4.08 టీఎంసీల నీటిని విడుదల చేసినట్లు తెలిపారు.రాష్ట్రంలోనూ నీటి పరిమితులు ఉన్నప్పటికీ, తమ ప్రజల అవసరాలను దృష్టిలో ఉంచుకుంటూనే పొరుగు రాష్ట్రమైన తమిళనాడుకు సహకరించేందుకు కట్టుబడి ఉన్నామని పేర్కొన్నారు.

నీరు వివాదానికి కాదు.. సహకారానికి మూలం
నీరు రాష్ట్రాల మధ్య వివాదాలకు కారణం కాకుండా, పరస్పర సహకారానికి మార్గంగా నిలవాలని అభిప్రాయపడ్డారు. రాష్ట్రాల మధ్య సమన్వయం, కేంద్ర ప్రభుత్వ సహకారంతో గోదావరి–కావేరి నదుల అనుసంధాన ప్రాజెక్టును ముందుకు తీసుకెళ్లగలిగితే, దక్షిణ భారతదేశంలో నీటి కొరతకు దీర్ఘకాలిక పరిష్కారం లభించే అవకాశం ఉందని పేర్కొన్నారు.

ఈ ప్రాజెక్టు ద్వారా వ్యవసాయ రంగానికి ఊతం లభించడంతో పాటు, లక్షలాది మంది రైతుల జీవితాల్లో సానుకూల మార్పులు తీసుకురావచ్చని ఆశాభావం వ్యక్తం చేశారు. నీటి వనరులను సమర్థంగా వినియోగించుకోవడం ద్వారా వ్యవసాయ అభివృద్ధి, ఆర్థిక పురోగతి సాధ్యమవుతుందని తెలిపారు.

రాష్ట్రాల మధ్య పరస్పర సహకారం, సమన్వయంతో ఉమ్మడి నీటి వనరులను దక్షిణ భారతదేశ అభివృద్ధికి, ప్రజల సౌభాగ్యానికి ఉపయోగించుకోవచ్చని పేర్కొన్నారు.