దోహా: ఖతార్‌లో అక్టోబర్ 13న పలు ప్రాంతాల్లో తేలికపాటి నుంచి మోస్తరు వర్షాలు కురిశాయి. అల్ కరానా వాతావరణ కేంద్రంలో అత్యధికంగా 10.7 మిల్లీమీటర్ల వర్షపాతం నమోదైనట్లు ఖతార్ వాతావరణ శాఖ వెల్లడించింది.

దోహాకు నైరుతి దిశలో ఉన్న అల్ కరానాలో 10.7 మి.మీ. వర్షపాతం నమోదైనట్లు వాతావరణ శాఖ సోషల్ మీడియా ద్వారా తెలిపింది. బైద్ అల్ ఖా ప్రాంతంలోని వాతావరణ కేంద్రంలో 6.3 మి.మీ. వర్షపాతం నమోదైనట్లు పేర్కొంది.

ఖతార్‌లోని తీర ప్రాంతాల్లో పొగమంచు, మసక వాతావరణం ఉండే అవకాశం ఉందని వాతావరణ శాఖ అంచనా వేసింది. ఆకాశంలో అక్కడక్కడా మేఘావృతమై ఉంటుందని,  కొన్ని ప్రాంతాల్లో ఉరుములు, మెరుపులతో కూడిన వర్షాలు కురిసే అవకాశం ఉందని, ఈ సమయంలో బలమైన గాలులు వీచే సూచనలు ఉన్నాయని వాతావరణ శాఖ పేర్కొంది.