కువైట్ : స్కూల్ గోడపై రాతలు రాసి గోడను పాడుచేసిన వ్యక్తిని కువైట్ పోలీసులు అరెస్ట్ చేశారు. దెబ్బతిన్న గోడపై రాతలను తొలగించి, తిరిగి రంగులు వేసి పూర్వస్థితికి తీసుకురావాలని అధికారులు ఆదేశించారు. ఈ ఘటన అలీ సబా అల్ సలేం ప్రాంతంలో చోటుచేసుకుంది.

కువైట్ అంతర్గత వ్యవహారాల మంత్రిత్వ శాఖ తెలిపిన వివరాల ప్రకారం.. ప్రభుత్వ ఆస్తుల పరిరక్షణ, ప్రజల నుంచి వచ్చే ఫిర్యాదులపై చర్యలు తీసుకోవడంలో భాగంగా ఈ అరెస్ట్ జరిగింది. ఉప ప్రధానమంత్రి, అంతర్గత వ్యవహారాల మంత్రి షేక్ ఫహద్ యూసుఫ్ సౌద్ అల్ సబా ఆదేశాల మేరకు జనరల్ ట్రాఫిక్ డిపార్ట్‌మెంట్‌లోని సెక్యూరిటీ కంట్రోల్ విభాగం ఈ చర్యలు చేపట్టింది.

వాట్సాప్ ఫిర్యాదుతో వెలుగులోకి ఘటన

ట్రాఫిక్ ఫిర్యాదుల కోసం కేటాయించిన వాట్సాప్ నంబర్‌కు వచ్చిన ఫిర్యాదుతో ఈ ఘటన వెలుగులోకి వచ్చింది. పాఠశాల గోడపై ఓ వ్యక్తి రాతలు రాస్తున్న దృశ్యాలతో కూడిన వీడియోను ఫిర్యాదుదారులు అధికారులకు పంపించారు. దీనిపై విచారణ చేపట్టిన అధికారులు, గాలింపు చర్యల ద్వారా నిందితుడిని గుర్తించి అరెస్ట్ చేశారు.  

బంధువుల సమక్షంలో గోడకు మరమ్మతులు

మంత్రి ఆదేశాల మేరకు నిందితుడి బంధువులను కూడా అధికారులు పిలిపించారు. దెబ్బతిన్న గోడను తిరిగి పూర్వస్థితికి తీసుకురావాలని నిందితుడిని ఆదేశించారు. దీంతో అతడు తన బంధువుల సహకారంతో గోడపై రాతలను తొలగించి, తిరిగి రంగులు వేయించాడు. గోడను మునుపటి స్థితికి తీసుకొచ్చినట్లు అధికారులు తెలిపారు.

ప్రభుత్వ ఆస్తులను పాడుచేస్తే చర్యలు

ప్రభుత్వ భవనాలు, ప్రజా సౌకర్యాలకు సంబంధించిన ఆస్తులను కాపాడటం ప్రతి ఒక్కరి బాధ్యత అని కువైట్ అంతర్గత వ్యవహారాల మంత్రిత్వ శాఖ స్పష్టం చేసింది. ప్రభుత్వ ఆస్తులను పాడుచేసినా, వాటిపై అనధికారికంగా రాతలు రాసినా చట్టపరమైన చర్యలు తీసుకుంటామని హెచ్చరించింది. ఇలాంటి ఘటనలు ఎక్కడైనా కనిపిస్తే అధికారిక మార్గాల ద్వారా ఫిర్యాదు చేయాలని ప్రజలకు విజ్ఞప్తి చేసింది.