నివాస గృహం, వాహనం ధ్వంసం.. సౌదీ అరేబియాలో కొనసాగుతున్న క్షిపణి దాడుల కలకలం
రియాద్: సౌదీ అరేబియా రాజధాని రియాద్‌లో మరోసారి క్షిపణి దాడి కలకలం రేపింది. యెమెన్‌లోని హౌతీ మిలీషియా ప్రయోగించిన బాలిస్టిక్ క్షిపణిని సౌదీ వైమానిక రక్షణ దళాలు అడ్డుకుని ధ్వంసం చేయగా, దాని శకలాలు నివాస ప్రాంతంలో పడటంతో ఓ అరబ్ ప్రవాసికి గాయాలయ్యాయి. ఈ ఘటన బుధవారం, అక్టోబర్ 14న చోటుచేసుకున్నట్లు సౌదీ అరేబియా పౌర రక్షణ విభాగం వెల్లడించింది.

క్షిపణి శకలాలు ఓ నివాస గృహం, వాహనంపై పడటంతో పరిమిత స్థాయిలో ఆస్తి నష్టం సంభవించిందని అధికారులు తెలిపారు. సమాచారం అందుకున్న అత్యవసర సహాయక బృందాలు వెంటనే ఘటనాస్థలికి చేరుకుని సహాయక చర్యలు చేపట్టాయి. భద్రతా పరమైన అన్ని ప్రామాణిక చర్యలను అమలు చేసినట్లు పౌర రక్షణ విభాగం పేర్కొంది.

అంతకు ముందు రోజు కూడా క్షిపణి శకలాలతో నష్టం
రియాద్‌లో మంగళవారం కూడా రెండు క్రూయిజ్ క్షిపణులను సౌదీ రక్షణ దళాలు అడ్డుకున్న అనంతరం వాటి శకలాలు 15 నివాస గృహాలపై పడ్డాయి. ఈ ఘటనలో ఇద్దరు మహిళలు, ఒక పురుషుడు, ఒక చిన్నారి సహా నలుగురు గాయపడినట్లు సౌదీ అధికారులు వెల్లడించారు.
బుధవారం రియాద్‌ను లక్ష్యంగా చేసుకుని ప్రయోగించిన బాలిస్టిక్ క్షిపణిని అడ్డుకుని ధ్వంసం చేసినట్లు సౌదీ నేతృత్వంలోని సంకీర్ణ దళాల అధికార ప్రతినిధి మేజర్ జనరల్ తుర్కీ అల్ మాలికీ కూడా ధృవీకరించారు.

విమానాశ్రయం, చమురు సంస్థల పై దాడుల నేపథ్యంలో ఉద్రిక్తత
సౌదీ అరేబియాలో ఈ వారం వరుసగా క్షిపణి, డ్రోన్ దాడులు చోటుచేసుకుంటున్నాయి. గత శనివారం కింగ్ ఖాలిద్ అంతర్జాతీయ విమానాశ్రయంపై జరిగిన దాడుల్లో 13 మంది మరణించగా, ఆదివారం జరిగిన మరో దాడి అనంతరం ఒకరు మరణించినట్లు సమాచారం.
ఇదిలా ఉండగా, మంగళవారం ధహ్రాన్‌లోని సౌదీ అరామ్‌కో ప్రధాన కార్యాలయంలోని ఓ పరిపాలనా భవనాన్ని లక్ష్యంగా చేసుకున్న దాడిలో పరిమిత స్థాయిలో అగ్నిప్రమాదం సంభవించింది.

మరోవైపు, క్షిపణులు, డ్రోన్ దాడులకు మద్దతుగా హౌతీ గ్రూపు ఇంధన సదుపాయాలను వినియోగిస్తోందని ఆరోపిస్తూ, యెమెన్‌లో హౌతీల నియంత్రణలో ఉన్న ప్రాంతాల్లోని ఇంధన మౌలిక సదుపాయాలపై సౌదీ నేతృత్వంలోని సంకీర్ణ దళాలు సైనిక చర్యలు చేపట్టాయి.
వరుస దాడులతో సౌదీ అరేబియాలోని నివాస ప్రాంతాలు, కీలక మౌలిక సదుపాయాల భద్రతపై ఆందోళనలు పెరుగుతున్నాయి.