టాక్సీ, బస్సు అవసరం లేకుండా 5–7 నిమిషాల్లో రైలు స్టేషన్‌కు చేరుకునే అవకాశం
దుబాయ్‌: ప్రజా రవాణా ప్రయాణికులకు మరింత సౌకర్యం కల్పించేలా దుబాయ్‌లో కొత్త పాదచారుల వంతెన అందుబాటులోకి వచ్చింది. జుమైరా గోల్ఫ్ ఎస్టేట్స్ మెట్రో స్టేషన్‌ను ఎతిహాద్ రైల్‌కు చెందిన దుబాయ్ అల్ యలాయిస్ ప్యాసింజర్ స్టేషన్‌తో అనుసంధానించే ఈ వంతెనను గురువారం ప్రారంభించారు. దీంతో మెట్రో నుంచి ఎతిహాద్ రైల్ స్టేషన్‌కు టాక్సీ లేదా షటిల్ బస్సు ఎక్కకుండానే నేరుగా నడుచుకుంటూ వెళ్లవచ్చు.

5–7 నిమిషాల్లో రైలు స్టేషన్‌కు చేరుకోవచ్చు
దుబాయ్ మెట్రో రెడ్ లైన్‌లో ప్రయాణించే వారికి ఈ బ్రిడ్జి ఎంతో ఉపయోగకరంగా ఉండనుంది. ముఖ్యంగా అబుదాబి, ఫుజైరా నగరాలకు ఎతిహాద్ రైల్ ద్వారా వెళ్లే ప్రయాణికులకు ప్రయాణం మరింత సులభతరం కానుంది.
గతంలో మెట్రో స్టేషన్ నుంచి ఎతిహాద్ రైల్ స్టేషన్‌కు వెళ్లాలంటే షటిల్ బస్సును ఉపయోగించాల్సి వచ్చేది. తాజాగా అందుబాటులోకి వచ్చిన బ్రిడ్జితో ప్రయాణికులు నేరుగా నడుచుకుంటూ స్టేషన్‌కు చేరుకోవచ్చు. ఈ మార్గం ద్వారా ఒక స్టేషన్ నుంచి మరో స్టేషన్‌కు చేరుకోవడానికి సుమారు 5 నుంచి 7 నిమిషాలు పడుతుంది.

ఎస్కలేటర్లు, మూవింగ్ వాక్‌వేలతో సౌకర్యం

జుమైరా గోల్ఫ్ ఎస్టేట్స్ మెట్రో స్టేషన్‌లోని ఎగ్జిట్ 1, ఎగ్జిట్ 2 నుంచి ప్రయాణికులు ఈ బ్రిడ్జిను చేరుకోవచ్చు. ఎతిహాద్ రైల్ స్టేషన్‌కు వెళ్లేందుకు దిశానిర్దేశక బోర్డులు ఏర్పాటు చేశారు.
ఈ వంతెన మార్గం పూర్తిగా కప్పి ఉండటంతో పాటు, ప్రయాణికుల సౌకర్యార్థం ఎస్కలేటర్లు, కదిలే నడక మార్గాలు (మూవింగ్ వాక్‌వేలు) ఏర్పాటు చేశారు. దీంతో బయట రోడ్లపైకి వెళ్లాల్సిన అవసరం లేకుండా, వాహనాలను ఆశ్రయించకుండానే స్టేషన్‌కు చేరుకోవచ్చు.
అయితే, కొత్త వంతెన ప్రారంభమైనప్పటికీ షటిల్ బస్సు సేవలను నిలిపివేయలేదు. నడవడానికి ఇబ్బంది ఉన్నవారు, చిన్నపిల్లలతో ప్రయాణించేవారు, ఎక్కువ లగేజీ ఉన్నవారు బస్సు సేవలను వినియోగించుకోవచ్చు.

ఒకే చోట మూడు ప్రజా రవాణా సేవలు

ఈ అనుసంధానంతో దుబాయ్ మెట్రో, ఆర్‌టీఏ బస్సులు, ఎతిహాద్ రైల్ సేవలు ఒకే ప్రాంతంలో మరింత సులభంగా అనుసంధానమయ్యాయి. మెట్రో స్టేషన్ వెలుపల ఉన్న ఆర్‌టీఏ బస్ స్టాప్ కూడా యథావిధిగా కొనసాగుతుంది.
అబుదాబి లేదా ఫుజైరా నుంచి ఎతిహాద్ రైల్‌లో వచ్చే ప్రయాణికులు కూడా ఈ వంతెన ద్వారా జుమైరా గోల్ఫ్ ఎస్టేట్స్ మెట్రో స్టేషన్‌కు చేరుకుని రెడ్ లైన్‌లో తమ ప్రయాణాన్ని కొనసాగించవచ్చు.

సెప్టెంబర్ 30న ప్రారంభమైన ఎతిహాద్ రైల్ సేవలు

దుబాయ్ అల్ యలాయిస్ ప్యాసింజర్ స్టేషన్‌లో సెప్టెంబర్ 30 నుంచి ప్రయాణికుల రైలు సేవలు ప్రారంభమయ్యాయి. ఈ స్టేషన్ ద్వారా దుబాయ్‌ను ఎతిహాద్ రైల్ అంతర్‌ఎమిరేట్ రైలు నెట్‌వర్క్‌తో అనుసంధానిస్తున్నారు.

మెట్రో స్టేషన్ నుంచి నేరుగా నడిచి వెళ్లేందుకు వీలుగా బ్రిడ్జి అందుబాటులోకి రావడంతో ప్రయాణికులకు చివరి దశ ప్రయాణం మరింత సులభమైంది. ప్రజా రవాణాను ప్రోత్సహించడం, వ్యక్తిగత వాహనాలపై ఆధారపడటాన్ని తగ్గించడం, ప్రయాణ సమయాన్ని ఆదా చేయడంలో ఈ కొత్త అనుసంధానం కీలకంగా నిలవనుంది.