కువైట్: వాహన బీమా జారీ ప్రక్రియను పూర్తిగా డిజిటలైజ్ చేసేందుకు కువైట్ ఇన్సూరెన్స్ రెగ్యులేటరీ యూనిట్ కీలక నిర్ణయం తీసుకుంది. ఇందులో భాగంగా ‘బీమా’ (Bima) పేరుతో అప్‌డేట్ చేసిన ఎలక్ట్రానిక్ వ్యవస్థను ప్రయోగాత్మకంగా అమలు చేయనుంది. అక్టోబర్ 25 నుంచి డిసెంబర్ 31 వరకు ఈ ట్రయల్‌ పీరియడ్ కొనసాగనుంది. ఈ వ్యవస్థ ద్వారా ట్రాఫిక్ ప్రమాదాల వల్ల తలెత్తే థర్డ్ పార్టీ బాధ్యతలకు సంబంధించిన తప్పనిసరి వాహన బీమా పాలసీలను జారీ చేయనున్నారు.

పేపర్ పాలసీలకు స్వస్తి

కువైట్ వాహనాలకు సంబంధించిన తప్పనిసరి బీమా పత్రాలను అక్టోబర్ 25 నుంచి పాత పద్ధతిలో కాగితాల రూపంలో జారీ చేయడం నిలిపివేయనున్నారు. ఇకపై ఇన్సూరెన్స్ రెగ్యులేటరీ యూనిట్ అధికారిక వెబ్‌సైట్‌లో అందుబాటులో ఉండే ఎలక్ట్రానిక్ వ్యవస్థ ద్వారానే పాలసీలు జారీ చేయాలి. ఆమోదించిన వ్యవస్థ వెలుపల జారీ చేసిన బీమా పత్రాలు చెల్లుబాటు కావని అధికారులు స్పష్టం చేశారు.

ఎలక్ట్రానిక్ వ్యవస్థలో రెగ్యులేటరీ యూనిట్ వైపు నుంచి సాంకేతిక సమస్యలు లేదా అంతరాయాలు ఏర్పడితే, వెంటనే అధికారులకు సమాచారం అందించి కాగితాల రూపంలో పాలసీలు జారీ చేసేందుకు అనుమతి ఉంటుంది. అయితే, సమస్య ఇన్సూరెన్స్ కంపెనీ వైపు నుంచి తలెత్తితే, అందుకు గల కారణాలను యూనిట్‌కు తెలియజేయాలి. అటువంటి సందర్భాల్లో ముందస్తు అనుమతి తీసుకున్న తర్వాతే పేపర్ పాలసీలను జారీ చేయాల్సి ఉంటుంది.

ప్రైవేట్ వాహనాలకు మినహాయింపు

కువైట్‌లో చట్టపరమైన నివాస హోదా లేని వ్యక్తులకు చెందిన ప్రైవేట్ వాహనాల తప్పనిసరి బీమా పాలసీలను మాత్రం నిర్దేశిత నిబంధనల ప్రకారం కాగితాల రూపంలోనే జారీ చేయనున్నారు. ఇందుకోసం సంబంధిత వ్యక్తులు సెంట్రల్ ఏజెన్సీ ఫర్ అడ్రెస్సింగ్ ది స్టేటస్ ఆఫ్ ఇల్లీగల్ రెసిడెంట్స్ జారీ చేసిన చెల్లుబాటు అయ్యే పత్రాలను సమర్పించాలి.

కొత్త వ్యవస్థలో రిజిస్టర్డ్ ఇన్సూరెన్స్ కంపెనీలు తమతో ఒప్పందం చేసుకున్న బీమా బ్రోకర్లకు సబ్‌-యూజర్ ఖాతాలను అందించవచ్చు. ఇందుకు ఒప్పంద నిబంధనలు పాటించడంతో పాటు, అధీకృత ఉద్యోగుల వివరాలను నమోదు చేయాలి. బ్రోకర్లు తమకు లైసెన్స్ పొందిన కార్యాలయం నుంచే బీమా పాలసీలను జారీ చేయాల్సి ఉంటుంది.

నగదు చెల్లింపులపై నిషేధం

బీమా పాలసీలకు సంబంధించిన అన్ని చెల్లింపులు ఎలక్ట్రానిక్ పద్ధతుల్లోనే జరగాలని అధికారులు స్పష్టం చేశారు. నగదు రూపంలో చెల్లింపులను ఎట్టి పరిస్థితుల్లోనూ అనుమతించబోమని పేర్కొన్నారు.కొత్త నిబంధనలను పాటించని ఇన్సూరెన్స్ కంపెనీలపై 2019 నాటి ఇన్సూరెన్స్ రెగ్యులేషన్ చట్టం నంబర్ 125, దాని అమలు నిబంధనలు, సంబంధిత సవరణల ప్రకారం చర్యలు తీసుకుంటామని హెచ్చరించారు.