మనామా: కల్తీ మద్యం విక్రయించాడనే ఆరోపణతో ఓ వ్యక్తిని బలవంతంగా కారులో ఎక్కించుకుని, అతడి నుంచి డబ్బులు తీసుకున్న కేసులో ఇద్దరు బహ్రెయిన్‌ వ్యక్తులకు మూడేళ్ల జైలు శిక్ష విధిస్తూ హై క్రిమినల్ కోర్టు తీర్పునిచ్చింది. నిందితుల్లో ఒకరు కంపెనీ జనరల్ మేనేజర్ కాగా, మరొకరు అదే కంపెనీలో సెక్యూరిటీ గార్డుగా పనిచేస్తున్నారు. కోర్టు వివరాల ప్రకారం.. 32, 46 ఏళ్ల వయసున్న నిందితులు బంగ్లాదేశ్‌కు చెందిన 34 ఏళ్ల వ్యక్తిని నిర్బంధించి అతడి స్వేచ్ఛకు భంగం కలిగించినట్లు తేలింది. బాధితుడు బహ్రెయిన్‌లో ఫ్లెక్సీ వీసాపై నివసిస్తూ ప్రధానంగా కార్ వాషర్‌గా పనిచేస్తున్నాడు.

అర్ధరాత్రి కారులోకి బలవంతంగా..
బాధితుడు ఇచ్చిన ఫిర్యాదు ప్రకారం.. తెల్లవారుజామున 2.30 గంటల సమయంలో హూరా ప్రాంతంలో ఉండగా, తెల్లటి కారులో వచ్చిన నిందితుల్లో ఒకరు అతడిని బలవంతంగా వాహనంలోకి లాగారు. పోలీస్ స్టేషన్‌కు తీసుకెళ్తామని బెదిరించి, అతడి మొబైల్ ఫోన్‌ను తీసుకున్నారు. అనంతరం అతడి జేబులోని పర్సు నుంచి 500 బహ్రెయిన్ దినార్లను తీసుకున్నట్లు బాధితుడు పోలీసులకు తెలిపాడు. ఆ తర్వాత మొబైల్ ఫోన్‌ను తిరిగి ఇచ్చి, బాధితుడిని మళ్లీ హూరా ప్రాంతంలో వదిలిపెట్టారు. అక్కడి నుంచి బయటపడిన బాధితుడు పోలీసులను ఆశ్రయించడంతో కేసు వెలుగులోకి వచ్చింది.

కల్తీ మద్యం వివాదమే కారణం
కంపెనీ జనరల్ మేనేజర్‌కు నైట్‌క్లబ్‌లకు సరఫరా చేసేందుకు మద్యం అవసరమైంది. ఇందుకోసం సెక్యూరిటీ గార్డుకు 100 బహ్రెయిన్ దినార్లు ఇచ్చి మద్యం తీసుకురావాలని కోరాడు. అయితే, తీసుకొచ్చిన మద్యం నకిలీదని లేదా నాణ్యత లేనిదని అనుమానించడంతో ఇద్దరూ దానిని విక్రయించిన వ్యక్తిని కలవాలని నిర్ణయించుకున్నారు. బాధితుడిని కారులోకి ఎక్కించి, డబ్బులు తిరిగి ఇవ్వకపోతే పోలీసులకు అప్పగిస్తామని బెదిరించినట్లు కోర్టు పత్రాల్లో పేర్కొన్నారు. జనరల్ మేనేజర్ వాంగ్మూలం ప్రకారం, పోలీస్ స్టేషన్‌కు సమీపంలో బాధితుడు 74 బహ్రెయిన్ దినార్లు తిరిగి ఇవ్వడంతో అతడిని విడిచిపెట్టారు.

అయితే, బాధితుడు మాత్రం తన నుంచి 500 దినార్లు తీసుకున్నారని ఫిర్యాదు చేశాడు. ఈ ఘటనపై పోలీసులు దర్యాప్తు చేపట్టి, సీసీటీవీ ఫుటేజీ ఆధారంగా నిందితులను గుర్తించారు. సెక్యూరిటీ గార్డుకు గతంలోనూ నేర సంబంధిత శిక్షలు ఉన్నట్లు పోలీసుల విచారణలో వెల్లడైంది. కేసులో ఇరువురి వాదనలు, సాక్ష్యాలను పరిశీలించిన న్యాయస్థానం వారికి మూడేళ్ల జైలు శిక్ష విధించింది.