మక్కా: సౌదీ అరేబియాలోని మక్కాలో మసీదులో అనుచిత చర్యలకు పాల్పడిన కేసులో ఇద్దరు బంగ్లాదేశీయులకు ఉరిశిక్ష అమలు చేసినట్లు వార్తలు వెలువడిన నేపథ్యంలో, సోషల్ మీడియాలో వైరల్ అవుతున్న ఓ వీడియోపై హోలీ మాస్క్స్ సంస్థ స్పందించింది. ఆ వీడియోను ఈ ఘటనకు సంబంధించి ప్రచారం చేయడం తప్పుదారి పట్టించే విధంగా ఉందని స్పష్టం చేసింది.

ఇస్లాంలో అత్యంత పవిత్రమైన నగరమైన మక్కాలోని ఓ మసీదులో అసభ్యకర చర్యకు పాల్పడినందుకు నజ్రుల్ ఇస్లాం అబ్దుల్ బాసిర్, సితి అక్తర్ అనే ఇద్దరు బంగ్లాదేశ్ పౌరులకు అక్టోబర్ 14, బుధవారం సౌదీ అధికారులు ఉరిశిక్ష అమలు చేసినట్లు వార్తలు వెలువడ్డాయి. ఈ విషయాన్ని సౌదీ అంతర్గత వ్యవహారాల మంత్రిత్వ శాఖ ప్రకటించింది. అయితే, ఘటన జరిగిన మసీదు పేరు సహా ఇతర వివరాలను వెల్లడించలేదు.

మసీదుల పవిత్రతను కాపాడటం, ప్రజల గౌరవానికి భంగం కలిగించే నేరాలను అరికట్టడం, భద్రతను పరిరక్షించడం, న్యాయాన్ని అమలు చేయడంలో తమ నిబద్ధతను సౌదీ అధికారులు పునరుద్ఘాటించారు.

కాబా వద్ద వీడియోతో తప్పుడు ప్రచారం

ఇద్దరు బంగ్లాదేశీయులకు ఉరిశిక్ష అమలైనట్లు వార్తలు వచ్చిన అనంతరం, మక్కాలోని కాబా పవిత్ర నిర్మాణంలో ఉన్న నల్లరాయి ‘హజర్ అల్ అస్వద్’ సమీపంలో ఓ మహిళ, పురుషుడు ఉన్నట్లు కనిపిస్తున్న వీడియో సోషల్ మీడియాలో వైరల్ అయింది. ఈ వీడియోలోని దృశ్యాలే ఉరిశిక్షకు కారణమైన ఘటనకు సంబంధించినవంటూ పలువురు ప్రచారం చేశారు.

ఈ ప్రచారంపై స్పందించిన హోలీ మాస్క్స్ సంస్థ తన అధికారిక ‘ఎక్స్‌’ ఖాతా ద్వారా వివరణ ఇచ్చింది. వైరల్ అవుతున్న వీడియోకు ఉరిశిక్షల ఘటనతో సంబంధం లేదని, ఆ వీడియోను ఈ కేసుకు ఆధారంగా చూపించడం తప్పుదారి పట్టించడమేనని తెలిపింది.

మక్కా, మదీనాలోని రెండు పవిత్ర మసీదులకు సంబంధించిన వార్తలు, సమాచారాన్ని అందించే హోలీ మాస్క్స్ సంస్థ ఈ విషయంపై స్పష్టతనిచ్చింది. దీంతో సోషల్ మీడియాలో వైరల్ అవుతున్న వీడియోను నిజమైన ఘటనకు ఆధారంగా భావించవద్దని స్పష్టం చేసింది.