వైమానిక దాడుల సమయంలో సమీపంలోని సురక్షిత ప్రాంతాలకు వెళ్లాలి.. విమాన సర్వీసుల రద్దు ఈ నెల 24 వరకు పొడిగింపు

రియాద్: సౌదీ అరేబియాలో ప్రస్తుతం నెలకొన్న పరిస్థితుల నేపథ్యంలో అక్కడ నివసిస్తున్న భారతీయులు అప్రమత్తంగా ఉండాలని రియాద్‌లోని భారత రాయబార కార్యాలయం సూచించింది. వైమానిక దాడులు జరిగిన సందర్భంలో వెంటనే సమీపంలోని సురక్షిత ప్రాంతానికి వెళ్లాలని విజ్ఞప్తి చేసింది.

ఫొటోలు, వీడియోలు షేర్ చేయవద్దు

ప్రస్తుత పరిణామాలకు సంబంధించిన సమాచారం, ఫొటోలు, వీడియోలను చిత్రీకరించడం, ప్రచురించడం లేదా సామాజిక మాధ్యమాల్లో షేర్ చేయడం వంటివి చేయవద్దని భారత రాయబార కార్యాలయం తన తాజా సూచనల్లో స్పష్టం చేసింది.

దాడుల్లో గాయపడిన భారతీయులు చికిత్స పొందుతున్న ఆసుపత్రులను రాయబార కార్యాలయ అధికారులు సందర్శిస్తున్నారు. బాధితుల కుటుంబ సభ్యులతో నిరంతరం సంప్రదింపులు జరుపుతూ, వారికి అవసరమైన సహాయాన్ని అందిస్తున్నట్లు వెల్లడించింది.

విమాన సర్వీసులపై ప్రభావం

రియాద్ అంతర్జాతీయ విమానాశ్రయంలో విమాన కార్యకలాపాలు ఇంకా నిలిచిపోయాయని రాయబార కార్యాలయం తెలిపింది. దమ్మామ్, జెడ్డా, మదీనా విమానాశ్రయాలు కార్యకలాపాలు కొనసాగిస్తున్నప్పటికీ, కొన్ని అంతరాయాలు ఉన్నాయని పేర్కొంది.

ప్రస్తుత పరిస్థితుల నేపథ్యంలో సౌదీ అరేబియాకు వెళ్లే, అక్కడి నుంచి వచ్చే విమానాలపై భారత విమానయాన సంస్థలు ఆంక్షలను పొడిగించాయి.

ఎయిర్ ఇండియా, ఎయిర్ ఇండియా ఎక్స్‌ప్రెస్, ఇండిగో: అక్టోబర్ 24 వరకు అన్ని మార్గాల్లో విమాన సర్వీసుల నిలిపివేత పొడిగింపు.

ఆకాశ ఎయిర్: అక్టోబర్ 27 వరకు అన్ని మార్గాల్లో విమాన సర్వీసుల నిలిపివేత.

సౌదీ విమానయాన సంస్థల సేవలు కొనసాగింపు

సౌదీకి చెందిన సౌదియా ఎయిర్‌లైన్స్ దమ్మామ్, జెడ్డా, మదీనా విమానాశ్రయాల నుంచి భారతీయ గమ్యస్థానాలకు షెడ్యూల్ ప్రకారం విమానాలను నడుపుతోందని రాయబార కార్యాలయం తెలిపింది.

అత్యవసరంగా స్వదేశానికి వెళ్లాల్సిన భారతీయులు అవసరమైన వీసాలు పొందిన అనంతరం బహ్రెయిన్, కువైట్ లేదా ఖతార్ మీదుగా ప్రయాణించే ప్రత్యామ్నాయ మార్గాలను పరిశీలించాలని సూచించింది.

ప్రస్తుత పరిస్థితులను దృష్టిలో ఉంచుకుని భారతీయులు అధికారిక సూచనలను పాటించాలని, ప్రయాణానికి ముందు విమాన సర్వీసుల తాజా స్థితిని సంబంధిత విమానయాన సంస్థల ద్వారా నిర్ధారించుకోవాలని రాయబార కార్యాలయం సూచించింది.