కువైట్‌: కువైట్‌లోని అల్‌ రెహాబ్‌ ప్రాంతంలో మూడంతస్తుల నివాస భవనంలో నిర్వహిస్తున్న అక్రమ మద్యం తయారీ కేంద్రాన్ని అంతర్గత వ్యవహారాల మంత్రిత్వ శాఖ అధికారులు గుర్తించి, దానిని ధ్వంసం చేశారు. ఈ కేంద్రం నుంచి స్థానికంగా తయారు చేసిన మద్యాన్ని ఉత్పత్తి చేసి పంపిణీ చేస్తున్న నెట్‌వర్క్‌ను పోలీసులు గుర్తించినట్లు అధికారులు వెల్లడించారు.

జనరల్ డిపార్ట్‌మెంట్ ఆఫ్ క్రిమినల్ ఇన్వెస్టిగేషన్ అధికారులు విస్తృత దర్యాప్తు, క్షేత్రస్థాయి నిఘా అనంతరం ఈ దాడులు నిర్వహించారు. మూడు అంతస్తుల భవనంలో తనిఖీలు చేపట్టి, మద్యం పదార్థాలతో నింపిన సుమారు 300 కంటైనర్లను స్వాధీనం చేసుకున్నారు. 

చుట్టుపక్కల ఇళ్లకు ప్రమాదం
దర్యాప్తులో భవనం మొత్తాన్ని మద్యం తయారీ కోసం ఉపయోగిస్తున్నట్లు గుర్తించారు. అక్కడ మండే స్వభావం కలిగిన ప్రమాదకర పదార్థాలు కూడా లభించాయి. దీంతో సమీపంలోని ఇళ్లకు ప్రమాదం పొంచి ఉన్నట్లు అధికారులు గుర్తించారు. ప్రమాదకర పదార్థాలను సురక్షితంగా తొలగించేందుకు జనరల్ ఫైర్ ఫోర్స్ సిబ్బందిని రంగంలోకి దించారు.

అక్రమ కార్యకలాపాలకు సంబంధించిన ఉల్లంఘనలను తొలగించేందుకు విద్యుత్, నీరు, పునరుత్పాదక ఇంధన మంత్రిత్వ శాఖ అధికారులు భవనానికి విద్యుత్ సరఫరాను నిలిపివేశారు. స్వాధీనం చేసుకున్న వస్తువులను ధ్వంసం చేయడంతోపాటు సంబంధిత ఉల్లంఘనలపై చర్యలు తీసుకునే బాధ్యతను కువైట్ మున్సిపాలిటీకి అప్పగించారు.
ఈ వ్యవహారంలో అనుమానితులపై చట్టపరమైన ప్రక్రియ ప్రారంభించారు. వారిని తదుపరి చర్యల కోసం సంబంధిత అధికారులకు అప్పగించారు. నేర కార్యకలాపాలకు ఉపయోగించే ప్రాంతాలపై నిఘా కొనసాగిస్తామని, అక్రమాలకు పాల్పడే వారిని గుర్తించి చట్టప్రకారం చర్యలు తీసుకుంటామని కువైట్ అంతర్గత వ్యవహారాల మంత్రిత్వ శాఖ స్పష్టం చేసింది.