దుబాయ్: అంతర్జాతీయ స్థాయిలో జరుగుతున్న ఆన్‌లైన్ మోసాలను అడ్డుకునేందుకు యూఏఈ నేతృత్వంలో చేపట్టిన ప్రత్యేక ఆపరేషన్‌ ద్వారా 123 మిలియన్లకు పైగా మోసపూరిత ప్రయత్నాలను అడ్డుకున్నట్లు ఐక్యరాజ్యసమితి (UN) ప్రకటించింది. ఈ ఆపరేషన్‌లో భాగంగా $39 బిలియన్లకు పైగా సొమ్మును తిరిగి స్వాధీనం చేసుకోగా, 960 మందికి పైగా వ్యక్తులను అరెస్ట్ చేశారు.

‘ఆపరేషన్ కాన్‌ఫ్రంటేషన్ ఘోస్ట్’ (Operation Confrontation Ghost) పేరుతో చేపట్టిన ఈ అంతర్జాతీయ ఆపరేషన్‌లో 30 దేశాలు, 13 అంతర్జాతీయ కంపెనీలు, రెండు అంతర్జాతీయ సంస్థలు పాల్గొన్నాయి. యూఏఈ ఉప ప్రధాని, అంతర్గత వ్యవహారాల మంత్రి షేక్ సైఫ్ బిన్ జాయెద్ అల్ నహ్యాన్ బుధవారం ఈ వివరాలను వెల్లడించారు. మానవ భద్రత అనేది దేశాల సరిహద్దులను దాటి అందరూ బాధ్యతగా తీసుకోవాల్సిన అంశమని ఆయన పేర్కొన్నారు.

ఏ తరహా మోసాలను అడ్డుకున్నారు?

ఐక్యరాజ్యసమితి డ్రగ్స్ అండ్ క్రైమ్ కార్యాలయం (UNODC) ఈ ఆపరేషన్ ఫలితాలను ప్రకటించింది. కృత్రిమ మేధస్సు (AI) ఆధారిత మోసాలు, ఆన్‌లైన్ బెదిరింపులు, డిజిటల్ ప్లాట్‌ఫామ్‌ల ద్వారా జరిగే ఆర్థిక మోసాలు వంటి నేరాలను లక్ష్యంగా చేసుకుని ఈ ఆపరేషన్ నిర్వహించారు. వివిధ దేశాల మధ్య రియల్‌టైమ్ నిఘా సమాచారాన్ని పంచుకోవడం ద్వారా ముప్పులను వేగంగా, కచ్చితంగా గుర్తించి చర్యలు తీసుకున్నట్లు వెల్లడించారు.

అంతర్జాతీయ సహకారమే కీలకం

అంతర్జాతీయ సరిహద్దులను దాటి జరిగే నేరాలను అరికట్టడంలో దేశాల మధ్య భాగస్వామ్యం ఎంత ముఖ్యమో ఈ ఆపరేషన్ ఫలితాలు నిరూపిస్తున్నాయని షేక్ సైఫ్ తెలిపారు. భద్రతా భాగస్వామ్యాల విలువను పాల్గొన్న దేశాలు, సంస్థల సంఖ్యతో కాకుండా.. క్షేత్రస్థాయిలో సాధించిన ఫలితాలు, ప్రజల భద్రతకు కలిగిన ప్రయోజనాలతో అంచనా వేయాలని ఆయన పేర్కొన్నారు. ఈ ఆపరేషన్‌ను యూఏఈ తొలిసారిగా సెప్టెంబర్‌లో అబుదాబిలో జరిగిన 15వ ఐక్యరాజ్యసమితి నేర నివారణ, నేర న్యాయ సదస్సు సందర్భంగా ప్రకటించింది.